Popular Bible Verses from Taitos 1

Share

Dem se dem nuo Gad, bot dem no gwaan laik se dem nuo im. Dem de kain-a piipl de sik Gad tumok. Dem no du wa im se an dem so woklis dat dem kyaahn du notn gud.

Evriting kliin fi di piipl we aat kliin an uufa main no ful-a sin. Bot notn no kliin fi di wan dem we mek sin ruul dem an we no biliiv. Fi dem aat an main doti.

Di elda mos uol aan chrang pan di riil mesij bout Jiizas, we wi tiich. Im afi du dis so im kyan tiich piipl di rait sitn an karek di wan dem we a tiich di rang sitn.

Sins di elda a-go inchaaj a Gad wok, im afi bi sumadi we di piipl dem kyan rispek an no av notn bad fi se bout. Im no fi ful-a imself, kwik fi get beks an im no fi lov waar niida. Im no fi lov jringk tu moch an im no fi lov ron dong moni. Insted-a dat, di elda mos uopm op im ous tu piipl, lov du gud sitn an im aat mos kliin. Im mos fier tu evribadi an im mos nuo ou fi kanchuol imself an du we im nuo iina im main rait an no fala wa im badi waahn fi du.

Wan elda mos liv im laif so dat nobadi kyaahn se notn bad bout im. Im mos onggl av wan waif an im pikni dem fi biliiv iina Jiizas. Im pikni dem no fi wail ar go gens wa dem mada an faada se bot mos aalwiez shuo dem rispek.