Popular Bible Verses from Filipiyan 4

Share

No wori wori op unuself bout notn. We unu fi du a prie tu Gad bout evriting, aks im fi we unu waahn, an gi im tangks fi evriting.

Wen unu du dat, Gad wi gi unu piis iina unu aat an main iina wan wie we unu kyaahn iivn andastan. Im a-go du it so unu no afi wori bout notn, kaaz unu an di Laad a wan.

Mi breda an sista, wan muor ting mi waahn se tu unu. Unu si eniting we chuu, eniting we unu kyan rispek, eniting we rait, eniting we gud an kliin, eniting we piipl kyan luk pan an fiil gud bout, eniting we piipl kyan taak gud bout, eniting we fit fi get big op — a dem sitn de unu fi set unu aat an main pan aal di taim.

Mi kyan du eniting, kaaz Krais Jiizas gi mi di powa fi du it.

Unu fi eva api, kaaz unu an di Laad a wan! Mi a se it agen, unu fi api!

An kaaz unu an Krais Jiizas kluos, fi mi Gad gweehn gi unu evriting we unu niid. An unu nuo se im wel rich, an we im av kyaahn ron out.

Di sitn dem we unu lorn, an we unu get fram mi, an we unu ier an si mi du, a dem sitn de unu fi aalwiez du. Wen unu du dem sitn de, Gad, di onggl wan we kyan gi unu piis iina unu aat an main, im wi bles unu.

Liv iina wan wie so dat evribadi kyan si se unu tek taim wid ada piipl. Di Laad suun kom bak.

Mi nuo ou it fiil fi no av notn an mi nuo ou it fiil fi av nof. Mi lorn ou fi satisfai iina evriting no mata wa apm, weda mi onggri ar mi beli ful, weda mi av nof ar mi no av notn.

A no kaaz mi niid notn mek mi a se we mi a se, kaaz mi lorn ou fi satisfai no mata ef mi av nof ar ef mi av likl bit.