Popular Bible Verses from Filipiyan 2

Share

So no du notn jos so unu kyan get wa unu waahn. An no shuo aaf fi chrai mek piipl tingk unu impuotant ar beta dan nobadi. Wa unu fi du a ombl unuself an chriit wan aneda beta dan ou unu wuda chriit unuself. An unu no fi luk out onggl fi unuself wan, bot unu fi kier bout unu breda an sista dem tu.

Unu si siem laik ou Krais Jiizas tan, a siem so unu fi tan tu, an unu fi tingk jos laik ou im tingk

Iina evri wie im did aalwiez tan laik Gad, bot im neva tingk se im did afi eng aan pan dat. Insted-a dat, im gi op evriting laik se im a neehn nobadi, an im kom dong a ort kom sorv laik wan sliev an kom mongks wi laik wan naamal sumadi. An wen im du dat, im ombl imself an du aal we Faada Gad did waahn im fi du — im aal gi op im laif pan di kraas.

Unu kyan liv da wie de, kaaz a Gad a wok iina unu laif. A Gad mek unu waahn fi du di sitn dem we im waahn unu fi du. An a im gi unu di chrent fi du dem tu. An wen unu du dem, it mek im wel api.

Siek-a we im du, Faada Gad tek im op a evn an put im iina di tap-a-tap pozishan an gi im wan speshal niem we biga dan evri ada niem. Faada Gad du dat so evribadi iina evn, an pan ort an anda di ort wi afi go dong pan dem nii siek-a di niem Jiizas, an so dat evribadi wi afi go taak wid dem uona mout mek piipl ier, se, “Jiizas Krais a fi dem Laad.” An wen dem se dat, Faada Gad wi get big op an nof rispek.

Du we unu afi du an no bada grombl grombl an aagyu bout wa unu fi du. Da wie de, nobadi kyaahn paint no fingga pan unu, kaaz unu a Gad pikni we a liv kliin an naa miks op iina di torbl sitn dem we di piipl we a liv iina da taim ya a du. Nuo! Unu a shain laik wan brait lait iina di worl.

So mi gud fren, unu si siem laik ou unu aalwiez du we Gad waahn unu fi du, no onggl wen mi de de wid unu bot wos laik ou mi no de de, gwaan du di sitn dem we wi mek piipl si se Gad siev unu an unu av nof rispek fi im iina evriting we unu a du.