Popular Bible Verses from Jiemz 1

Share

Mi breda an sista, unu fi wel api wen chobl an kraasiz tek unu. Kaaz unu nuo se dem sitn de kom fi tes unu fi si ef unu a-go stil chos iina Gad. Wen dem chobl de tek unu, ef unu gwaan chos iina Gad siem wie, unu wi kyan tan op chrang no mata wa.

Ef sumadi no waiz, aal dem afi du a aks Gad an im wi mek dem waiz, kaaz Gad naa go uol bak notn fram dem. Im wi gi dem wa dem aks fa so dem wi nuo se im lov dem.

Mi breda an sista, ier wa mi a se, unu mos kwik fi ier an sluo fi taak ar get beks.

Unu fi gwaan uol aan chrang no mata wa apm an chos iina Gad so unu kyan bi aal we Gad waahn unu fi bi, an so unu wi no shaat a notn.

Unu no fi onggl ier Gad mesij — unu fi du wa it se! Ef unu onggl a lisn an naa du wa Gad se, unu onggl a fuul unuself.

Ef unu uol aan chrang an no gi op wen unu a go chuu chraiyal an kraasiz we kom fi tes unu, unu a-go wel api. Kaaz wen unu tes don, Gad gweehn gi unu di kroun a laif we im pramis fi gi evribadi we lov im.

Evri gud sitn — di sitn dem we no av notn bad bout dem — kom fram Faada Gad we mek aal a di lait dem we iina di skai. Bot im no tan laik di lait dem we im mek. Dem eva a chienj, bot im no chienj op chienj op.

Ef nobadi ier di mesij an no du wa it se, dem komiin laik wan man we luk pan imself iina wan lukin glaas, si wa im luk laik, an afta im don luk, im go we an no memba a ting we im luk laik.

Di kain-a wok we gud an kliin iina Faada Gad yai a dis: elp di pikni dem uufa faada an mada dem ded an we a sofa, an di uman dem we ozban ded an we a sofa tu, an kip we fram di wikid sitn dem we iina di worl.

Wen yu fiil fi du sopm wa yu nuo se rang, no bada se a Gad mek yu fiil fi du it. Kaaz nobadi kyaahn presha Gad fi du wa rang, an Gad no presha nobadi fi du wa rang niida. Bot wen sumadi fiil fi du wa rang, a siek-a di wikid sitn we iina dem aat. Di sitn dem iina dem aat presha dem fi du wa rang.

Gad piipl dem we puor mos buos bout ou Gad lif dem op an put dem pan tap.