Popular Bible Verses from Iibruu 11

Share

Wen wi chos iina Gad it mek wi shuor bout di sitn dem we wi onggl uop se wi a-go get, an wi nuo se di sitn dem we wi kyaahn si, dem de de fi chuu. A dis mek Gad did api wid wi faada faada dem.

Nou ef sumadi no chos iina Gad, dem kyaahn mek im api non at aal. Kaaz enibadi we kom kom worship Gad afi biliiv fos se Gad de fi chuu, an dat im a-go du som uol iip a gud sitn fi di wan dem we luk fi im aad aad.

Kaaz wi chos iina Gad, wi andastan se im jos se di wod an di worl mek, so di sitn dem we wi kyan si, dem kom fram di sitn dem we wi kyaahn si.

Kaaz Iebriyam chos iina Gad, wen Gad kaal im, im lisn. An so im go a wan plies we im did bout fi get fram Gad, im go de iivn duo im neehn nuo a wich paat im did a go. An kaa im chos iina Gad im muuv go a di lan we Gad pramis im an liv de laik farina. Im liv iina tent wid Aizak an Jiekob. Gad did mek di siem pramis tu dem tu.

Afta Gad waan Nowa bout di sitn dem we Nowa kudn si yet, a kaaz Nowa chos iina Gad an av nof nof rispek fi im mek im lisn we Gad se an go bil wan big buot fi siev im fambili. Kaaz Nowa did chos iina Gad so, im kot aaf imself fram di piipl dem iina di worl an shuo se dem rang kaa dem no chos iina Gad. Gad se, “Nowa a sumadi we du wa rait” kaaz Nowa chos iina im.

Kaaz Iinok did chos iina Gad, Gad did tek im op wich paat im de wen im did stil alaiv, so im neehn ded at aal, an nobadi kudn fain im kaa Gad did tek im op. An Gad du dat kaa im did mek Gad api siek-a wa im du.

A kaaz Iebl chos iina Gad mek im bon wan beta sakrifais gi Gad dan Kien. A kaaz im chos iina Gad mek Gad se im api wid im, an se im a sumadi we du di rait sitn dem. An siek-a di chos we im chos iina Gad, im stil a chat iivn duo im ded, kaaz wa Iebl did du stil a sen wan mesij tu wi.

Aal wen Siera neehn av no pikni, an did paas di taim fi av biebi, an Iebriyam did tuu oul fi gi ar non, im chos se Gad wuda kip im pramis an so Gad mek Iebriyam kuda gi ar biebi.

Iebriyam tan de kaaz im did a luk faawod fi wan siti we Gad did jraa op an bil. Da siti de tan op pan som chrang foundieshan.

Siek-a ou Muoziz chos iina Gad wen im did get big, im neehn waahn nobadi kaal im Fiero daata pikni. Im did prefa fi sofa wid Gad piipl dem, dan fi go av fon fi wan likl wail an miks op iina sin. Im did fiil se di sofarieshan we di wan we Gad sen fi siev piipl go chuu, wot muo dan aal a di rich sitn dem we de a Iijip. Im did fiil so, kaaz im yai did de pan di blesn dem we im did a-go get. Siek-a ou im chos iina Gad, im lef Iijip an neehn fried se di king mait-a beks. An im neehn ton bak. Im uol aan pan di Gad we nobadi kyaahn si, laik se im kuda si im.

Kaaz Iebriyam did chos iina Gad wen Gad did tes im, im did redi fi sakrifais Aizak gi im. Im did get di pramis we Gad did mek wid im, an im did stil redi fi gi op im wan dege-dege bwai.

Rieyab we did sliip wid man fi moni, shi neehn ded wen di piipl dem we neva lisn Gad did a ded aaf. Shi neehn ded kaaz shi did chos iina Gad, an wen di chrienja dem kom fi spai out di siti, shi did tek dem iina ar ous an aid dem.

Kaaz di piipl dem did chos iina Gad, dem did paas chuu di Red Sii laik se a jrai lan dem a waak pan, bot wen di Iijip piipl dem did chrai fi du dat tu, di uol a dem joun aaf.

Kaaz di piipl dem did chos iina Gad, Jeriko waal did jrap dong afta di piipl dem did maach roun it fi sevn die.

Kaaz im chos iina Gad im did kom bring iin di Paasuova alidie an did mek di blod springkl pan di duor dem, so di Ienjel we kom fi kil wudn kil di fos bwai pikni dem fi di izrel piipl dem.

Kaaz Juozif did chos iina Gad, wen im did bout fi ded im did taak bout di taim wen di Izrel piipl dem did a go kom outa Iijip, an im did tel dem bout wa dem fi du wid im badi wen im ded.

Kaaz Jiekob chos iina Gad, wen im did a ded, im bles evri wan a Juozif pikni dem an im liin op pan im waakn tik a worship Gad.

Aizak chos iina Gad an so im bles Jiekob an Iisaa, an biliiv se fi dem blesn a-go kom iina di fyuucha.