Popular Bible Verses from 'O Roma 14

Share

Sababu nako ma Jo'oungu ma Dutu wapareta 'o nyawa moi-moi nanga 'ahu, ge'ena koisilamo-lamowau 'okia naga gee pa'odomo de pa'okere. 'Isilamo-lamo ge'ena la pamoteke ma Jo'oungu ma Dutu 'awi mau, nanga singina 'iriidi de padawongo 'o morene 'o Ngomasa 'Itebi-tebinino. 'O nyawa gee ma Kristus wileleani ma ngekomo kone'ena, 'ona ge'ena ma Jo'oungu ma Dutu 'awi singina yasanangi, de 'o nyawa 'iregu-regu yakihoromati.

Nako ngone po'ahu, po'ahu ma ngale ma Jou. De nako ngone posongene, posongene ma ngale ma Jou. So po'ahu bolo posongene, ngone ne'ena to ma Jou.

Sababu ge'ena to ngone nanga dumutu ge'ena la salingou posidadi 'o rimoi de pomasikakuata moi de moi.

Sababu ge'ena 'uwau ngone pomasikasala moi de moi. Ma 'ena 'ifoloi yaowa 'uwa niodiai 'o kianikia gee ma duanguku 'ania 'esa moi ka 'o ngo-ngaku moi yosowono.

Sababu naga 'o Buku 'Itebi-tebinoka 'isilefoku, <<Ma Jou wongose, <Ngoi ne'ena ma Jo'oungu ma Dutu to'ahu-'ahu. 'O nyawa moi-moi 'asa yosuba 'ai bionoka; de 'o nyawa moi-moi 'asa yongose 'ato ngoiou ne'ena ma Jo'oungu ma Dutu.> >> So ngone moi-moi 'asa potaari de pomadasango ma Jo'oungu ma Dutuka ma ngale to ngone nanga di-diai.

Salingou niakidawongo 'o nyawa gee manga ngo-ngaku koikua-kuatuwa, 'uwa nimakaba-baili de de 'ona ma ngale to 'ona ma sirete manga di-dibangi.

Ngini koyadaenuwa niakisisowono 'o nyawa 'iregu manga gilaongo, koge'enali mita koya'akunuwa niakisisowono ma Jo'oungu ma Dutu 'awi gilaongo. 'O gilaongo gu'una wadiai 'iti-tiai bolo 'isowo-sowono ge'ena 'awi tuangi 'awi 'urusangi. De dua 'o gilaongo gu'una 'asa wodiai yaowa-owa, sababu ma Jou wa'akunu widiai koge'ena.