Popular Bible Verses from Dadunu 6

Share

Ma JOU Ma Jou'ongu Madutu, ga'a ngini ni silamo'o re siḏubuso, Unanga gena-ge ngini Nu dadalara reninga 'akala re sinyingara mo-moini, reninga fikirana mo-moini, reninga de-de'e mo-moini.

Sidoto'o demo-demo gena-ge taninga ngowa-ngowa'a tau-taunu. Ngini balasu na sijarita ra ananga gena-ge wakutu tegoro toma wala ma dara bolo ni sisoi'i tala wala re ni tagi rou, toma 'orasa mau otu bolo wakutu ni momi'i ḏua.

Re ngini ni 'elingi demo-demo gena-ge taninga 'akala re sinyingara ma dara ga'a Ngoi ta singadolo ra ngini wangere nange-ne.

<<Hei ngowa'a Israel na 'isene la-la! Ma JOU, pa'i Ma JOU ḇato Ma Jou'ongu Madutu ga'a ngene wo silamo'o re siḏubuso.

Sipiri'u huku-hukumu gena-ge taninga giama re sipiri'u ḏi'i taninga memese sa'olo nana'o la na 'elingi tau-taunu.

Silefo huku-hukumu re singosama toma ngi'i ma ceka'a kara enanga gena-ge sipata toma wala ma ngalana ma ngasu'u ma kuwiḏa re toma ngalana lamo'o taninga limau.>>

Ngini balasu ni silamo'o re mojongo Ma JOU, Ma Jou'ongu Madutu ga'a ngini ni silamo'o re siḏubuso. Unanga gena-ge ngini nu siḏagi 'Ai mau, re na'o ngini ni 'a'a jaji pa'i ni masisasi reo Ma JOU 'ai lomanga ḇato.

<<Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'O jaji ḏua rema sasi taninga ngimo-ngimono: Abraham, Ishak re Yakub mangale Unanga ḏuanga i'a 'O pula'a nagara gena-ge di'a ngini. Re toma nagara gena-ge 'age limau-limau lamo'o re kama kuranga 'oru ua, ga'a ngini na side'oso ua; wala-wala 'i romanga reo 'ori i'a rana ma la-la, ga'a ngini na singosama ua, re sumu-sumu ga'a ngini na paiti ua, re guḏa-guḏa 'anggur re ate zaitun, ga'a ngini ni soana ua. Re wakutu ngini ni oromo ngini ḏuanga i'a ni basono ḏugala, totoho la-la ino la awa ni sidaioranga Ma JOU ga'a Ro sigasa ngini supu toma Mesir, ngi'i gena-ge ngini ni dadi budaka.

'A Musa dadunu 'o kanau moju toma ngowa'a Israel ma betongo so'o ne:<<Nena-ne parenta rimoi: gena-ge huku-hukumu re 'atoranga-'atoranga, Ma JOU 'o soma'a ngoi ta sidoto'o ra ngini. Unanga gena-ge, Ma Jou'ongu Madutu ga'a ngini ni silamo'o re siḏubuso. Ngini balasu ni siḏagi parenta gena-ge toma daeraha ga'a ti'ara riwara ngini na osama re ḏegoro. Na'o taninga 'ahu ma giḏanga ma dara, ngini re ninga ju'uda tala gena-ge 'aḏi mete'e huku-hukumu re 'atoranga-'atoranga mo-moini gena-ge ga'a ngoi ta singadolo, ḏua ngini ni sijumu mode-mode'e ni silamo'o re mojongo Ma JOU Ma Jou'ongu Madutu ga'a ngini silamo'o re siḏubuso re ngini ḏuanga ni tegoro ti'ara toma nagara gena-ge.

Re ngini ni si'a'a 'ori ga'a banari re la-la ra Ma JOU 'ai momina, la ngini ḏuanga i'a ni 'ahu la-la kama kuranga ua re ni osama re ḏegoro toma tana'a ma rousu ga'a Ma JOU Ro 'a'a jaji rema sasi taninga ngimo-ngimono mangale Unanga 'o pula'a gena-ge ra ngini.

Sababu Ma Jou'ongu Madutu ga'a ngini silamo'o re siḏubuso 'age taninga sigolona, Unanga gena-ge 'O oḏu'u site-tero Unanga reo 'oru ḇato. Na'o ngini ni silamo'o re siḏubuso jou'ongu ma somoara, Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'Ai duruta ga'a ma tero sa'olo u'u, enanga ḏuanga i'a 'i leja-lejanga ra ngini singadolo Unanga 'o singi-ngiranga ngini mo-moini.>>

Awa ni silamo'o re siḏubuso jou'ongu ma somoara ga'a bangsa-bangsa ga'a tegoro se-sebanga ngini, ananga gena-ge 'aḏi silamo'o re siḏubuso.

<<Awa ni tai'i Ma JOU, Unanga gena-ge Ma Jou'ongu Madutu ga'a ngini silamo'o re siḏubuso, di'a golo'o Unanga gena-ge 'o 'a'a 'ori i'a hera-heranga sa'olo bukti Unanga 'o kalesanga ngini ma tero ga'a ngini ni si'a'a toma Masa.