Popular Bible Verses from Matʉyo 6

Share

Puŋ pě ntáʼ Nofɔŋ Mboʼmvé pwɛ meno pɛ́ a ŋgerɛ́ŋged siŋ ye nɛ́ ŋkɔŋ, kɛ́ʼɛ́ ŋgâ a záʼá ndúŋú fɛ́ ŋkɔŋɔ ye náá ne puŋ.

Puŋ ndɛ tsé gbíí mbəb yuŋ ŋkyé nǐmwɔ́. Nǐmwɔ́ tséʼé ye no ne tómbəb yé, ŋkyé ŋgâ no ke mbɛ ne yé zhyémve.»

«A zhyɛ́ yéré mə ntsɔ́ ne puŋ ŋgâ puŋ ndɛ tse ntsuŋɛ ŋkyé tsómvé yúŋ, ŋgâ puŋ ndzɔ́ɔ́ kɔ́, kii ŋkyé mbəb yuŋ ŋgâ puŋ gbéé kɔ́? ŋkyé ŋgâ, tsómvé tséʼé ghebe kaʼatɛ tsɛ́ɛ́ mwɔ̌zó, mbəb pó tséʼé ghebe kaʼatɛ tsɛ́ɛ́ ndzwé.

Ŋgɛ ŋkhú ne wo, ŋkhoʼyɛ́ wo zɔŋɔ ntsɛ́ʼɛ́mboʼmvé nɛ́, ŋkúŋɔ́ ndzaʼandáb wo yé sə̌me, fûŋ ntswee yé, ntsɛ́ʼɛ́mboʼmvé, Tɛd wo wɛ́ a yóʼó ndzó ywoʼɔ́zhibɛ́ nɛ́. Tɛd wo wɛ́, a zhʉ́ ndzó ywoʼɔ́zhibɛ́ nɛ́, náʼá núʼɔ́ pwó wo.

«Ŋgɛ ŋkhu ne puŋ, puŋ ntsɛ́ʼɛ́ Mboʼmvé pe kaʼa: Tɛd ywí, wo wɛ́ wo pépéé nɛ́, Zhyɛ́ ŋkɔŋɔ pɔŋ náá ghúʼú tíí wo. Zhyɛ́ ŋgâ Nofɔŋ wo kʉ́yó, Zhyɛ̂ ŋkɔŋɔ ndúŋú tsetsáʼ náá zhyɛ́ no yɛ́ wo zɔŋɔ nɛ́ Syé ghaŋ, njʉ́ a pépéé nɛ́.

Fɛ́ mwɔ̌zó ne psi ndzebe njʉ́ a ŋkhúʼɔ́ mbəb psi nɛ́

Máʼ vɔ̌no pɛ́ psi vɔ mbəb wo nɛ́, Njʉ́ kpaʼ psi, psi ke máʼa yé pɔŋ pɛ́ pɔ́b mvɔ́no mbəb psi nɛ́.

Kii pó mbzyɛ́ ŋgâ kəpɔŋ kpɛ́ʼɛ́ ywí! Ntsʉʼmbé, kpéé ywí pwó ŋgaŋakpeʼe.

Ŋkyé ŋgâ, a pɛ́ɛ́ yɛ́ puŋ máʼ kəpɔŋ pɔŋ nɛ́, mbǒ Mboʼmve Tɛd wuŋ wɛ́ a pépéé nɛ́, ke ŋkʉ́yó máʼ vɔ̌no púŋ.

Puŋ tiŋí pɛ péshʉŋ pépéé njʉ́! Pɔ́b tsé mbé pfɛ́ mɔ́b pó, kii pó tsé ŋkaba! Pɔ́b tsé mbé yɛ́rɛ́ mɔ́b ndzó pɛ ntaŋ pó! Tɛd wúŋ pépéé ntsʉ́ʼ ntsé njʉyí wɔ́b! Puŋ tséʼé ghebe kaʼatɛ ntsɛ́ɛ́ péshʉŋ pɔɔ?

«Puŋ ndɛ ndɛrɛ́ yuŋ foʼ pe ndúŋú tsetsáʼ, ywoʼ yɛ́ ŋgɔ́ʼ pwɛ fuʼ shʉbɛ mɔ́b nɛ́. Ywoʼ yɛ́ gháŋagháŋ ntsú tsindáb, ndzwə́ə́ nɛ́. Ntsʉʼmbé puŋ yɛ́rɛ yuŋ foʼ pe pépéé. Ywoʼ yɛ́ ŋgɔ́ʼ kii fuʼ tsé mbé shʉbɛ mɔ́b nɛ́ pó. Ywoʼ yɛ́ gháŋagháŋ tsé mbé tsú tsindáb kii pó tsé ndzwə́ə́ nɛ́. Ŋkyé ŋgâ ywoʼ yɛ́ foʼ wo yóʼó nɛ́, ndzɔʼ yo ke mbɛ́ɛ́ yóʼó.»

«Tɛɛmbɛ ŋɔŋ pe fáʼa pwó Ntsɛɛpɔŋ pépáá taʼ kɛɛ pó. Mbǒ a mbáŋá taʼ ye kʉ́yé cyó, kii ŋgâ a ndɛ́rɛ́ mbəb taʼ ye gbáŋá cyó. Tɛɛmbɛ puŋ pe fáʼa pwó Mboʼmvé pú mbób taʼ kɛɛ pó.»

A pɛ́ɛ́ yɛ́ Mboʼmvé gbéé mkpeegháŋ mpfuŋ kɛ́ʼɛ́, mkpeegháŋ yɛ́ a mpfuŋ ndzebé, nǐmwɔ pé ghɛ́ ntɔ́ŋɔ́ ne mɔ́ɔ́ nɛ́, tɛ ŋkɛ́ɛ́ yíkɔ́ ne puŋ? Psyɛ́ndzɔʼ yúŋ khóó kaʼatɛ!

Ŋgɛmbɛ ne wo, ŋkhoʼyɛ́ wo tsé fɛ́ yɔ́b pwó mbɔ́ŋ nɛ́, wo ndɛ ŋgyɛ́ njʉ́ ŋɔŋ ndzɛ́ yɔ́b yɛ́ wo fɛ́ nɛ́, a pɛ́ɛ́ mbɛ wɔ́! Yânéré ŋgâ ghebe pǔndzɔʼ yo pe ywʉ̂me. Kɛ́ʼɛ́ ŋgâ, Mboʼmve, Tɛd wo wɛ́, a zhʉ́ mbɛ meno pɛ́ pé ywʉ ywʉ́ nɛ́, náʼá nuʼɔ́ pwó wo.»

Yěsô ké mbó ntsó ŋkʉ́rʉ́ ŋgâ: «Puŋ zhyaŋa ne ŋgyɛ́ne no psyɛ́ndzɔʼ yúŋ síŋ pumésɔŋ, kɛ́ʼɛ́ ŋgâ pɔ́b zhʉ́ wúŋ. Mbǒ puŋ náʼá ntséʼé tsɔʼɔfaʼ yúŋ síŋ Tɛd wúŋ, yé wɛ́ á pépéé nɛ́, pó.

«Ŋkhoʼyɛ́ puŋ tsé ndzɛ́ nse nɛ́, kii puŋ ndɛ tsé ŋɛbɛ záŋ yúŋ, njʉ́ pɛ pépwɔmíí zhyɛ́ nɛ́: pɔ́b ŋuʼɔ záŋ yɔ́b ne nyǒʼne pwó pɔŋ ŋgâ pɔ́b tsé ndzɛ nse. Kpaʼ sísíŋ, mə səŋɛ wúŋ ŋgâ, pɔ́b kɛ tséʼé ntsɔ́ʼɔ́faʼ yɔ́b. Ŋgɛmbɛ ne wo, ŋkhoʼyɛ́ wo tsé ndzɛ́ nse nɛ́, sǒ záŋ yo, nǔʼ tó wo ne vód tswɔtwɔ́, yânéré ŋgâ pɔŋ ndɛ ndzé ŋgâ wo tsé ndzɛ́ nse. Ntsʉʼmbé, ndaʼ Mboʼmve Tɛd wo, wɛ́ a ndzó ywoʼɔ́zhibɛ́ nɛ́, ze. Tɛd wo wɛ́, a zhʉ́ ndzó ywoʼɔ́zhibɛ́ nɛ́, náʼá núʼɔ́ pwó wo.»