Popular Bible Verses from Juan 16

Share

Yʉ mʉjãrẽ atie nipetirere wede yʉmena ĩcãrõ nirucũrẽmenarã mʉjãrẽ yerisãrẽ diamacã maquẽmena nirucũãro ĩgʉ̃. Marĩcʉ̃ mʉjãcã atibʉrecopʉra niñerõcãrẽ atibʉreco macãrã mʉjãrẽ bʉtoro posañerõcã tiroagawa. Cʉ̃jãcã tairo ticapetacã yʉmena wãcũtutuaya. Merẽ yʉ atibʉreco maquẽ tutuarere cametʉanʉcãsiawʉ ―ĩ wedewi Jesús ʉ̃sãrẽ.

Espíritu Santo diamacã maquẽrẽ masĩñerõcã tigʉ watigʉpʉra mʉjãrẽ nipetire diamacã maquẽrẽ ñurõ wedesʉguegʉagawi mʉjãcã diamacã maquẽmena nirucũãtora abiro. Cʉ̃ cʉ̃basurupe cʉ̃ye maquẽpere wedeherigawi. Buripe Manigʉ̃ yʉpacʉcã cʉ̃rẽ wededotirere cʉ̃cã tʉorepe wadorena wedegʉagawi. Ĩñerõcã tairora siropʉ biatecãrẽ mʉjãrẽ bue, masĩñerõcã tigʉagawi.

Mʉjã marĩcʉ̃ anocãrõjoromena yʉpacʉre icãta apeyeno yawãmemena sãĩherijomocã. Tairo tira marĩcʉorore yʉpacʉre yawãmemena sãĩña. Mʉjã cʉ̃rẽ tora abiro sãĩrã mʉjãcã sãĩãriguere cʉ̃cã mʉjãrẽ nʉnirẽrẽna mʉjã ñerõãcu. Tairo tira tiemena mʉjã bʉtoro ʉseacametʉara nirõãcu.

Yʉ mʉjãrẽ diamacãrã wedegʉda. Yʉcã mʉjãrẽ waweoñerõcã docare ñujo. Yʉcã waheriñerõcãpere mʉjãrẽ titamurucũãcʉ mʉjãmena nirucũgʉ̃ watiherigawi. Buri yʉ warisuagʉ doca yʉbasurupera mʉjãrẽ cʉ̃rẽ ticogʉacu. Cʉ̃ Espíritu Santo watigʉpʉra basoca atibʉreco macãrãrẽ ‘yʉre wedewõhera ñañarẽ cʉora ñawã’ ĩ masĩñerõcã tigʉagawi. Ĩñerõcã yʉre ‘cʉ̃ icãta ñañarẽrẽ tiheriwi; tairo tigʉ wapa cʉoheriwi’ ĩ masĩñerõcã tigʉagawi. Tairora cʉ̃ Espíritu Santora ‘merẽ atibʉreco macãrã dotigʉre Manigʉ̃cã ñañarõ tiyoacʉpʉ ñawĩ’ ĩ masĩñerõcã tigʉagawi. Yʉpe yʉpacʉ cʉtiropʉ pʉtʉagʉ ya. Tairo tira mʉjã yʉre ĩñanemoheriga.

Mʉjãcã marĩcʉorore tora abirora bʉtoro wãcũpasʉtiremena nirã ya. Buri yʉpe mʉjãrẽ siro upatutira ĩñanemogʉacu tamʉ. Yʉcã tairo biñerõcã ĩñarã mʉjãye yeripũnarĩpʉre bʉtoro ʉseare cʉoroacu. Mʉjãcã tairo ʉsearemena nirẽrẽ icãta ĩcʉ̃nopera emamasĩherigawi. Tibʉreco eañerõcã mʉjã yʉre icãta ĩcãwãmenorẽ sãĩñaheriga. Mʉjãrẽ diamacãrã wede. Yʉpacʉ nipetirere mʉjãcã yawãmemena sãĩrẽrẽ tʉogʉ mʉjãcã sãĩrõrã abirora nipetirere nʉnigʉagawi.

Yʉ mʉjãrẽ atiere queorora wedegʉda. Yʉcã cõwõãrẽmena mʉjãcã bʉtoro oti wãcũpasʉtiriwatoa atibʉreco macãrãpe bʉtoro ʉseara nirõãgawa. Buri bicapetacã mʉjãcã wãcũpasʉtire nimoãrigue sirosãñurõrẽ bʉtoro ʉsearepe wasoaroacu.