Popular Bible Verses from Efesios 1

Share

Apeyecãrẽ yʉ, Manigʉ̃rẽ “cʉ̃jãrẽ tʉomasĩñerõcã tiya” ĩ sãĩbosa, cʉ̃yarare cʉ̃cã sioriarare “ ‘nʉnigʉ̃da’ ĩriguere yuerucũrẽrẽ queorora ñerõãcu” ĩ masĩdotigʉ tairora atie cʉ̃yamacã macãrãrẽ cʉ̃cã nʉniãte ñucametʉanʉcãrẽrẽ “nocʉ̃ñepaca ñarĩ” ĩ masĩãro ĩgʉ̃. Ĩñerõcã tairora Manigʉ̃rẽ ñubue mʉjãrẽ sãĩbosa, cʉ̃ye tutuare yapacʉtiherere nipetiresotoa nirẽrẽ, Jesucristore wedewõrãrẽ tie tutuaremena titamurẽrẽ ñurõ tʉomasĩrã earo ĩgʉ̃. Tie tutuaremenarã Manigʉ̃ Cristore cõwõãrigʉpʉrena masõ ʉmʉãwesepʉre cʉ̃cã dotiduiro diamacã panepe doporigʉ niwĩ topʉ Cristore ʉmʉãwese macãrãrẽ, atidita macãrãrẽ nipetira tutuare cʉorare, nirũpãrãrẽ, dotirare, no ãpẽrã dotira nirãnosotoare dotirucũãcʉ sonegʉ̃. Tairo tigʉ Cristo nipetira nirũpãrã anocawatoa macãrãrẽ, siropʉ macãrã nirũpãrã niãnacãrẽ dotirucũgʉ̃ ñawĩ.

Marĩrẽ ñurõ wañerõcã tigʉra atibʉrecore cʉ̃cã tiatosʉgueropʉra marĩrẽ ñesiarigʉ niwĩ Cristomena ĩcãrõ nirã eañerõcã tigʉdagʉ. Tairo tirigʉ niwĩ marĩrẽ cʉ̃cã ĩñacorore ñañarẽ cʉohera, ñañarẽrẽ tiheririarara abiro wapa cʉohera niñerõcã bogʉ. Manigʉ̃ mamarõpʉra cʉ̃cã boriawãmerã abiro marĩrẽ bʉtoro maĩnigʉ̃ Jesucristocã tiriguemena ãpẽrã pũnapʉre necʉogʉra abiro marĩrẽ “yʉ pũna niñerõcã tigʉda” ĩcũsiarigʉ niwĩ.

Marĩ cʉ̃ Cristomenarã ĩcãrõ ña. Merẽ cʉ̃cã cõwõã di cõãriguemena marĩcã ñañarẽ tirigue wapare marĩrẽ wapatibosariguemenarã Manigʉ̃ marĩrẽ marĩcã ñañarẽ tiriguere acõborigʉ niwĩ. Anorã abiro Manigʉ̃ marĩrẽ cʉ̃cã ñurõ tirere paca nicametʉarejoro nirẽrẽ eñoriguemenarã

Manigʉ̃rẽ marĩ Nirũpʉ̃ Jesucristo Pacʉre ʉseare nʉnirãda. Cʉ̃rã marĩrẽ ʉmʉãwese maquẽmena marĩye tʉoiñarẽpʉre nipetiremena ñurõ wañerõcã tirigʉ niwĩ marĩrẽ cʉ̃mena ñurõ niãro ĩgʉ̃. Atiere tairo tirigʉ niwĩ cʉ̃cã marĩrẽ Cristomena ĩcãrõ nirã eañerõcã tiremena.