Popular Bible Verses from 2 Corintios 4

Share

Marĩcʉorore ʉ̃sã atibʉreco warepere, marĩcã ĩñarẽpere ĩñanirã wãcũnʉnʉheri; merẽ tie nocãrõgãmerã petiate wado ña. Buripe ʉmʉãwesepʉ marĩcã niãte maquẽpere, marĩcã ĩñaherepere wãcũnʉnʉ. Marĩcʉorore marĩcʉ̃ marĩ tiere ñurõ masĩheri; buri topʉre tairo catirucũmocãrõãcu ĩrẽpʉare ñucametʉaro masĩ.

Tairo tira ʉ̃sã sʉtiro manirõrã tocãrõrã tidumocãrãda ĩherara atie quetire basocare wederucũmocã. Bʉtoa wanirã õpe ʉ̃sãye ũpʉ̃ maquẽ tutuarecã petiwʉmʉãcapetacãrã Manigʉ̃pe ʉ̃sãrẽ bʉrecoricãrõ ʉ̃sãye yeripũnarĩpʉpʉare õpe tutuara, wãcũtutuarara ninemorã eañerõcã yawí. Tairo tira ʉ̃sã atibʉrecopʉre ʉ̃sãcã anorã abiro ñañacametʉaro posaremenarã Manigʉ̃cã ʉ̃sãrẽ siropʉre tiatere abiro wãcũ: “marĩcã atibʉrecopʉre ñañarõ posare nocãrõgãmerã petiate ña. Yoariwatoa nirucũheriga. Buri atieye wapamenarã Manigʉ̃cã ñurõ tiate icãta petiheriga, tiesotoajoro pairojoro ñeno dʉsaro manirõ ñucametʉaro nirucũrã eañerõcã tiatera nirõãcu” ĩ wãcũ ʉ̃sã.

Tiwãmerã ãpẽrãcã ʉ̃sãrẽ Manigʉ̃ye wederere pitiñerõcã tirugaremena ʉ̃sãrẽ paje ñañarẽ cametʉañerõcã ticapetacãrã, ʉ̃sã wãcũpasʉtiheri. Wãcũpasʉtiracã Manigʉ̃ marĩrẽ titamuherigawi; tairo tira tocãrõrã tidumocãrãda ĩheri. Basocacã ʉ̃sãrẽ ñañarõ tirugara quetatucapetacãrã Manigʉ̃pe ʉ̃sãrẽ ʉ̃sã wadore cũcõãheriwi. Ʉ̃sãrẽ cʉ̃jã apewatoare bʉtoro dotenedocacũcaperacãrã ʉ̃sãrẽ icãta sĩãcõãmasĩheriwa.

Tie ñucametʉanʉcãrẽ wapacʉtirera ña Manigʉ̃cã cʉ̃ye mama ñurẽ quetire wededotigʉ cʉ̃cã ʉ̃sãrẽ wiyoriguere ʉ̃sãcã ʉ̃sãye ũpʉ̃rĩ dimena weyoriaparʉ pajarera abiro nirĩũpʉ̃rĩpʉ ʉ̃sãcã cʉore. Abiro niñerõcãrã ʉ̃sãcã cʉ̃ye mama quetire wedeñerõcã basoca “tie queticã tutuare cʉore Manigʉ̃menarã wati” ĩ masĩwã. Ʉ̃sãmenapere dimena weyoriaparʉ pajarara abiro nirãmenapere “tie queticã tutuare cʉore watiheri” ĩ masĩwã.

Cʉ̃jãcã tora abiro tiere ñurõ tʉomasĩ wedewõhereye wapara atibʉreco macãrãya manigʉ̃ wãtĩã nirũpʉ̃ cʉ̃jãrẽ tʉomasĩhera, caperi ĩñabʉaherara abiro pʉtʉara eañerõcã yawí, cʉ̃jãrẽ Jesucristo ñucametʉa nirẽrẽ basocare cametʉogʉye queti ñurõ bowe asibaterere, cʉ̃ Jesucristora Manigʉ̃cã nirĩwãmerã abiro nigʉ̃rẽna icãta tʉomasĩmasĩherijomocãrã nirã earo ĩgʉ̃.

Merẽ cʉ̃ Manigʉ̃rã mamarõpʉcãrẽ nipetiro atiditaro naĩtĩãrõ nirĩwatoapʉcãrẽ cʉ̃cã “bowere niãña” ĩrẽmenarã bowerere niãñerõcã tirigʉra cʉ̃cã tairo tiriarora abirora marĩrẽ marĩye yeripũnarĩpʉre bowere niãrora abiro ñurõ tʉomasĩrã nirã eañerõcã yawí Manigʉ̃ cʉ̃cã ñucametʉagʉ nirẽre Jesucristomenape marĩrẽ ĩñamasĩrã eañerõcã tigʉ.