Popular Bible Verses from 1 Corintios 7

Share

Tairo tira manʉ nigʉ̃cã cʉ̃ nʉmomena apayosa comena tusarugañerõcã co cʉ̃rẽ dotiaro. Cʉ̃pecã nʉmocã cʉ̃rẽ apayosa cʉ̃mena tusarugañerõcã cʉ̃cã core yʉaro. Cʉ̃jãcã Manigʉ̃rẽ ñubueradara “toquẽbʉrecorijoro marĩ tiere tiherimocãrãda” ĩ cʉ̃jãcã came wederucũpʉtʉariasiro docare cʉ̃jã tiere icãta tiherimocãro. Manigʉ̃rẽ cʉ̃jãcã ñubueariasiropʉ docare cʉ̃jãcã wãcũpʉtʉariarora abirora upatuti cʉ̃jãbasurupe came apayosa tusaro tamʉ. Tora abiro cʉ̃jãcã ĩãriawãmerã queoro tiheriñerõcãpere, tiro manirõrã ninirã nʉcãrã eaheriñerõcã wãtĩã nirũpʉ̃ cʉ̃jãrẽ ñañarõ tidocasãgʉ̃ cʉ̃jãrẽ ãpẽrãmenape ñañarõ tiñerõcã tibogawi.

Manʉ nigʉ̃ manʉsʉmʉãcã tiboriwãmerã queoro tigʉ cʉ̃ nʉmo nigõmena wadorena apayosa tusaro. Nʉmo nigõcã nʉmosãrõmiãcã tiboriwãmerã queoro tigo co manʉ nigʉ̃mena wadorena apayosa cʉ̃mena tusaro. Manʉcʉtigo nigõrẽ coya ũpʉ̃ diamacãrã abiro niheri; manʉya ũpʉ̃pʉ nirõ ya. Tiwãmerã nʉmocʉtigʉ nigʉ̃cãrẽ cʉ̃ya ũpʉ̃ diamacãrã abiro niheri; nʉmoya ũpʉ̃pʉ nirõ ya.

Manigʉ̃ marĩrẽ ñañarẽ tirepere dotiepeyoribasoca nirãrẽ tiere dotiepeyoheribasoca nirã eañerõcã tigʉ cʉ̃ macʉ̃ Jesucristocã cõwõãgʉ̃ di cõãrẽmenarã wapatibosarigʉ niwĩ. Tairo tiro marĩrẽ basocanopere yʉrono tira o cʉ̃jãnopere tʉorono tira Manigʉ̃pere tʉo tiquetaturo bo.