Popular Bible Verses from Alom 1

Share

Ine siniona njhoni kuuzila uthenga wa Bwino, wene ni mbhavu ya Mnungu, iyo yaombola wandhu wonjhe amkhulupilila Yesu. Kuyambila Ayahudi ni anyiawo osati ayahudi.

Pakuti uthenga wa bwino walangiza umo Mnungu wafunila tikhale kuti tivomelezeke pachogolo pake, chindhu ichi chichitika kwa kumkhulupilila Yesu Kilisito, palibe china kupitilila chimecho, ngati umo yalembedwa mmalembo, “Mundhu wovomelezeka kwa Mnungu siwakhale kwa kumkhulupilila Mnungu.”

Kuyambila yapo Mnungu wadaumba jhiko, kukhoza kwake ni umnungu wake, ingakhale siuoneka kwa maso, wajhiwikana padanga. Wandhu akhoza kwajhiwa, kuchokana ni vindhu ivo waviumba ndande imeneyo palibe mundhu ata mmojhi wakhoza kukamba sitimjhiwa Mnungu.

Ingakhale ajhiwa kuti kuli Mnungu, nambho sampacha ulemu uwo ufunika, ni samuyamika mmalo mwake maganizo yawo yali yoipa ni njelu zao zilibe kandhu ni zili ni usabwabwa.

Aung'anamula uzene wa Mnungu ni kuuchita ukhale unami, achilemekeza ni kuchilambila choumbidwa ni Mnungu pambuyo pa kumlambila Mnungu mwene, uyo idafukika kulambilildwa muyaya! Ikhale chimwecho.

Kuchokela kumwamba, Mnungu waakwiila wandhu wajha amkana ni achita voipa, anyiyawo kwa njila zao zoipa auchekeleza Uthenga wa Bwino kuti siudajhiwika.

Chipano, Mnungu waasiya achate khumbilo loipa. Wachikazi ang'anamula matupi yawo, ni kutumila mosafunikile kwa kukhumbilana achinawene kwa achina wene. Ni wachimuna chimwecho, asiya kukhumbilana wamnuna ni wamkazi, akhumbilana anyiiwo kwa anyiiwo. Wachimuna achitilana vindhu va njhoni, chimwecho saalangidwe kuchokana ni vichito vao voipa. Pakuti wandhu adakana kumjhiwa Mnungu, Mnungu wasiya mumaganizo yao yoipa, achite vijha siadafunike kuvichita.

Achitadama kuti ali ni ekima, nambho ni asabwabwa. Asiya kumlambila Mnungu wa muyaya, ni pambuyo pake, avilambila viboliboli vili chifani cha mundhu uyo wamwalila, chifani cha zinyama, mbalami ni vokwawa.