Popular Bible Verses from Apocalipsis 12

Share

Qá'a jen' qadaỹi loxonec jeso'me, qochiỹoxotaiỹilo naua' letauo' so' n'aanaxate c'óxot, qataxa ỹasouaxat da' n'aqtac 'me ỹ'axátetac. Qá'a jen'me ỹátaqta sa 'te da' dó'e, qataxa qaỹa 'te ga' ỹiga da' temaqaidi da' ỹileetalégue jeda'me.

Qana'chi semachíỹa so' n'aqtac ỹátaqta ỹisam, chimaqpecot di' piỹem, 'enaac: —Ma'le nóvi' da' nec'alaxa, qataxa da' n'añaxac, qataxa da' l'onataxanaxac jiñi'me qademáỹi qadet'a Dios, qataxa da' lamaxasóxonaxac jeso'me namaq net'a nec'alaxaqui. Qá'a sóxote qoỹamaxáiỹi jeso'me qadó'o 'me ỹasaqátapeelégue da' loic na' qad'amaqténataxanaxau'pi di' nolo' qataxa di' pí'ỹaq da' v'iỹílaqta'uo ga' néta'ña ñi' qadet'a Dios.

Naqaida da' 'éeta joca'li qoỹamaxáiỹi jeso' sega'me ñaxadiaq. Jeso'me naqaiso so' nanaic 'me 'uáichiiñi da' doqovínaxan, lenaxat Satanás, jeso'me qadó'o paiỹac. Jeso'me qataxa ỹima so' nesoxonaqapi qoỹ'odalégue jen' 'aléua.

Chan'eesa 'am piỹem, qataxa ỹima na' 'am netalégue, ỹátaqta 'ami madet'ape qomle. Qaláxasa ỹátaqta choxodaicolec qomle na' netalégue na' 'aléua qataxa jaso'me huaxai. Qá'a so' qadó'o Satanás ỹátaqta dalemata. Jeso'me 'ami nenóchi'ñalo, qá'a jeso'me ỹaỹáteet'a da' ma'le sa qaỹáaque ga' lalóqo'.

Ỹim, qana'chi 'uo so' nelóiquiaxac let'ádaic, huo'ot di' piỹem, qá'a so' lasoxola' so' Dios lamaxasec piỹem lé'ecpi, lenaxat Miguel, qataxa ỹima so' nesoxonaqapi delóitapegue' so' síiỹac 'me sega'me ñaxadiaq. Jeso'me síiỹac qataxa so' nesoxonaqapi ỹátaqta delóiquitac

Huá'a, qana'chi so' síiỹac ỹátaqta dalemataỹa jaso' ỹauo, qana'chi jeso'me jéca da' ỹilóiquiaxan so' qapiỹáñi lec'oqtepi jaso'me, jen' ỹátaqta ỹalaxalóo'te naua' laqátaxaco ñi' Dios, qataxa ỹátaqta quetelóo'te naua' 'eesoda lasoxoco 'me ỹ'axa't josii'chi so' Jesucristo.

Qana'chi ỹitaxa di'ỹoq so' n'anec laqáỹa, 'eet'oi: Jaso' ỹauo nichaatétaaue jaso' c'atena, 'ená'am ga' lapoto. Qataxa so' 'auóxoic, qaa'le petalégue. Qataxa jaso'me ỹáatañi jaso' naxa'do ga' net'a. Jaso'me jaxa'do netaỹilo saua' doce huaqchiñi. Jaso' ỹauo, jaso'me qo'uaxai. Ỹátaqta dachitata, qana'chi ỹ'alqátac, ỹasouaxat da' sétaaque c'oi.

Qana'chi jaso' ỹauo niỹíñi so' lec'óxot lé'em, jeso'me sétaaque qoỹin da' net'a, qaidi ỹilo'ogue ỹima jen'me ỹodapecachi siỹaxadipi, ỹauót'ai so' lamaxasóxonaxat laicaua. Qaláxasa so' lec'óxot, jeso'me qodootáxanec, qana'chi qoỹidá'a ga' nes'ónaqa' ñi' Dios. Qaláxasa jaso' ỹauo dasóiỹi, ỹic'áta ga' totelégue 'aléua, ga' ỹaqátaxata't ñi' Dios da' sétaaque l'acháqa' jaso'me, qaidi jaso'me qoỹiqui'ỹáxatac, cha ỹivídaxatetreegue gaua' mil doscientos sesenta noloqo'te.

Ỹim, qataxa di'ỹoq so' n'anec laqáỹa huo'ot na' piỹem, 'eet'oi: So' síiỹac let'ádaic sega'me ñaxadiaq da' l'óiỹaxac. Jeso'me tóomaxadaic, qataxa siete naua' laqai'go, qataxa diez jan' lepee. Ñi' 'oonolec jen' laqaic ỹáatañi jan' naxa'do ga' net'a. Jen' láauenec jeso'me ỹaualegaxalégue jan' huaqchiñipi 'me net'ot di' piỹem. Qana'chi natelégue qa'en jen' 'aléua jaso' huaqchiñipi, jañi' 'oonole saua' tres jaso'me huaqchiñipi. Jeso' síiỹac sega'me ñaxadiaq, jeso'me nichaatet'asop jaso' ỹauo 'me sétaaque da' c'oi, da' sétaaque ỹalic so' lec'óxot da' niỹíñi.

Qaláxasa jaso' ỹauo qoỹanema saua' láua' lat'édail jen' huedélcaic, da' qaidi ỹañoxot da' huáỹo, ỹic'áta ga' totelégue 'aléua, da' qaidi qaỹá'a qoỹin so' nanaic, jega'me ná'ña jaso'me qana'chi qoỹiqui'ỹáxatac, ỹivídaxatetreegue gaua' tres 'uóidi qataxa ga' laiñi ga' huó'e laqáỹa. Qana'chi jeso' nanaic necosai'ỹi so' noxop, nái'ỹa na' nedégaxat, da' sétaaque 'en l'auáxac, da' qaidi huaỹoxon qa'en jaso' ỹauo. Qaláxasa jen' 'aléua lecochiỹa jaso' ỹauo. Qá'a jen' 'aléua ỹ'ouáchiỹi na' nedégaxat, qana'chi cáñi qa'en so' noxop 'me necosai'ỹi so' síiỹac.