Popular Bible Verses from Nambas 14

Share

!Yufala mas no agensim hem! !Yufala mas no fraetem olketa long ples ya, bikos olketa nating fitim yumi! !Bae yumi spoelem olketa nomoa! !Yawe hemi stap wetem yumi, an hemi winim finis olketa god blong olketa, so yumi no save wari!”

“An from disfala samting nao, mi prea kam long yu mekem yu somaot bikfala paoa blong yu. Bifoa, yu bin promisim mifala olsem, ‘Mi nao Yawe, an mi no save kros kuiktaem. Evritaem mi tinghevi long pipol blong mi. Mi fogivim olketa pipol blong mi, an mi tekemaot olketa ravis wei an sin blong olketa. Bat olketa hu i duim olketa ravis samting, mi mas panisim olketa, wetem pikinini blong olketa, an smolfala grani blong olketa, go kasem mektu grani blong olketa, an mektri grani wea bae i bon kam bihaen long olketa.’ Lod Yawe, plis yu kipim promis blong yu.

Sapos Yawe hemi hapi wetem yumi, bae hemi tekem yumi go long datfala ples, an bae hemi givim datfala lan fo yumi. Datfala lan hemi garem graon wea hemi gudfala tumas, an oltaem hemi garem kaikai long hem.

Bat wakaman blong mi Kelab hemi garem deferen tingting. Tingting blong hem hemi strong tumas long mi, so bae mi tekem hemi go long datfala lan wea hemi bin go long hem. An olketa wea bae i bon kam bihaen long hem nao bae i onam datfala lan.

Yutufala go sei long olketa ‘Mi Yawe, an mi mekem strongfala promis olsem bae mi duim samting wea yufala bin talem

Den Yawe hemi tok olsem long Mosis, “?Bae olketa ya i les long mi go-go kasem wataem? Nomata mi mekem plande mirakol finis long ae blong olketa, olketa nating trastem mi.

An olketa tok agensim Mosis an Haeprist Eron olsem, “!Hemi moabeta fo mifala dae long Ijip o long drae eria!

Bat Josua an Kelab, hu i bin go fo lukluk long lan ya, tufala filnogud tumas. An tufala brekem kaleko blong tufala seleva. An tufala tok olsem long evriwan, “!Maewat! !Lan wea mifala bin go lukim, hemi barava gud tumas!

Bat olsem mi laef an bikfala paoa blong mi hemi kasem evri ples long wol, mi mekem wanfala strongfala promis olsem: No eniwan long olketa save go insaet long lan blong Kenan. Olketa lukim finis saen blong paoa blong mi an olketa lukim tu olketa mirakol wea mi mekem long Ijip an long drae eria. Nomata olsem olketa testem mi plande taem tumas, an distaem olketa nating obeim mi. So olketa no save go kasem datfala lan wea mi bin promisim olketa olo blong yufala bifoa. Ya, no eniwan long olketa hu i agensim mi save go lukim datfala lan.