Popular Bible Verses from ମାତିଉ 6

Share

“ମତ୍ର ମିରୁ କାହେ ମୁଲାପେନୁତି ରାଜି ଅଟେ ଦାର୍ମିକତା ଦାହ୍‌ଦୁ, ଆଟେ ଇ ହାବେତ୍ କୁଲା ୱାଡ଼େ ମିଙ୍ଗେ ହିୱା ଆନେ ।

ଏଦାବାଗା ନିଞ୍ଜୁତି କସ୍ଟ ନିଞ୍ଜୁ ବାଗା ପାଡ଼ି, ୱେଃଏ ବାଗା ଚିନ୍ତା କିଃଆଟୁ, ଇନାକି ୱେଃଏ ବାଗା ୱେଃଏ ଚିନ୍ତା କିଦେରି ।”

“ଏଦାବାଗା ନାନୁ ମିଙ୍ଗେ ୱେସ୍‌ପିଞ୍ଜା, ଇନ୍ନା ତିନ୍ନାମୁ କି ଇନ୍ନା ଉନ୍ନାମୁ, ଇଞ୍ଜାନ୍ ମି ପରନ୍ ବାଗାଟି ଅଟେ ଇନ୍ନା ହୁଚ୍ଚିନାମୁ ଇଞ୍ଜାନ୍ ମି ଗାଣ୍ଡି ବାଗାଟି ଏଲୁ କିଆନ୍ ଚିନ୍ତା କିଃଆଟୁ । ତିନ୍‌ବା କୁଲାତାୱାଟି ପରନ୍ ଅଟେ ଜିରାଙ୍ଗ୍ ଅଙ୍ଗିଙ୍ଗ୍ ତାୱାଟି ମୁକ୍କେଲ୍ ଗାଣ୍ଡି କି ବେର୍ରାଦ୍ ଆଃଏ ?”

ମତ୍ର ମିରୁ ପ୍ରାତ୍‌ନା କିଅନ୍ ବାଗା ମି ମ୍ଡାମି ମାନ୍ନି ବାକ୍ରା ଲାଃଇ ହାଜ୍ଜୁ ଅଟେ ଦାରା ଟୁଣ୍ଡାନାହି ମି ତଞ୍ଜୁ ଆଃଆନ୍ ଆବା ଟାକ୍କେ ପ୍ରାତ୍‌ନା କିଦୁ; ଆଟେ ମିରୁ ମ୍ଡାମେସ୍ ଇନ୍ନା କିଞ୍ଜେରି, ଏଦା ମି ଆବା ହୁଡ଼େଞ୍ଜାନେଞ୍ଜି, ଏୱାଞ୍ଜି ମିଙ୍ଗେ ପୁରସ୍‌କାର ହିଆନେଞ୍ଜି ।

ଏଦାବାଗା ମିରୁ ଇହିଙ୍ଗିସି ପ୍ରାତ୍‌ନା କିଦୁ, ଏ ମା ସର୍ଗତି ଆବା, ନି ପାରୁ ପିର୍‌ନି ଇଞ୍ଜାନ୍ ମାନି ଆପାକାଦି । ନି ରାଜି ୱାପାକାଦି, ଇନିସ୍ ସର୍ଗତାୱା, ଏହେଙ୍ଗିସି ଇ ପୁର୍ତିତାୱା ନି ଇଚ୍ଚା ସପଲ ଆପାକାଦି ।

ନିଞ୍ଜୁ ମାଙ୍ଗେ ମା ତିନ୍‌ବା ପଡ଼ି ହିଆମୁ ।

ଇନିସ୍ ମା ବିରୁଦିଆଟି ପାପ କିନ୍ନାରିକି ମାମୁ ମାକ୍‌ସାଡ଼ି କିଆନ୍ନାମୁ, ଏହେଙ୍ଗିସି ମା ପାପ ହାବେ ମାକ୍‌ସାଡ଼ି କିଆମୁ ।

ପରିକ୍ୟାତାୱା ମାଙ୍ଗେ ତାଚ୍ଚିୱାଃଆ, ମତ୍ର ଡ଼ଃଆନାୱାଟି ନିପ୍‌ତାମୁ । ଇନାକି ନି ରାଜି, ବଲ ଅଟେ ଗଉରବ କାଲେଙ୍ଗ୍‌କାଲା ନିନ୍ଦି ଆପାକାଦି । ଆମେନ୍ ।

ଇନାକି ମିରୁ ଜଦି ମି ବିରୁଦିଆଟି ଦୁସ କିଆନ୍ନି ଦାଲ୍ଲାତି ପାପ ହାବେ ମାକ୍‌ସାଡ଼ି କିଦେରି, ଏହେଙ୍ଗ୍ ଆତେସି ମି ସର୍ଗତି ଆବା ମିଙ୍ଗେ ୱାଡ଼େ ମାକ୍‌ସାଡ଼ି ହିଆନେଞ୍ଜି

“ଜାଗ୍ଗୁତି ପଟାଙ୍ଗ୍‌ତିଦି ହୁଡ଼ାଟୁ, ଏୱା ମାଟ୍ଟେହେଃଲ୍ଲ କି ରେଗେହେଃଲ୍ଲ କି କିଟ୍ଟାଇଡ୍ଡୁତାୱା ଉହି କିହେଃଲ୍ଲ, ଆତେସ୍‌ୱାଡ଼େ ମି ସର୍ଗତି ଆବା ଏୱାଡ଼ିକି ତିନ୍‌ବା ପଡ଼ି ହିନ୍ନେଞ୍ଜି । ମିରୁ ଇନ୍ନା ଏ ପଟାଙ୍ଗ୍‌ତାୱାଟି ଗାପ୍‌ଚି ମର୍ଗଗାଟାତାତେରି ଆଃଏମା ?”

“ଇମ୍ୱିନାୱା ପ୍ଡିକା ଅଟେ ଦିବା ନାହେଡ୍ କିନ୍ନେ ଅଟେ ମ୍ଡାମେଙ୍ଗା ଦାରା ଲେକ୍‌ଚାନ୍ ମ୍ଡାମି କିନେରି, ଇହିଙ୍ଗ୍‌ତି ଦନ ପୁର୍ତିତାୱା ମି ବାଗାଟି ଉହି କିଃଆଟୁ; ମତ୍ର ଇମ୍ୱିନାୱା ପ୍ଡିକା ଅଟେ ଦିବା ତିଃନ୍ନେଏ ଅଟେ ମ୍ଡାମେଙ୍ଗା ଦାରା ଲେକ୍‌ଚାନ୍ ଅନ୍ ମୁଃଏରି, ଇହିଙ୍ଗ୍‌ତି ଦନ ସର୍ଗତାୱା ମି ବାଗାଟି ଉହି କିଦୁ । ଇନାକି ଇମ୍ୱିନାୱା ମି ଦନ, ଏଦିମ୍ୱା ମି ମନ ମାନ୍ନେ ।”

“ରଃଅଞ୍ଜି କୁଏଞ୍ଜି ରିଃଆରି ସକାରତି କାମ୍ୱାରେଏଞ୍ଜି ଆଅନ୍ ମୁଃଏଞ୍ଜି; ଇନାକି ଏୱାଞ୍ଜି ରଃଅଞ୍ଜିକି ସ୍ରିଞ୍ଜିନେଞ୍ଜି ଅଟେ ରଃଅଞ୍ଜିକି ଜେଡା କିନେଞ୍ଜି ଅଟେ ରଃଅଞ୍ଜ୍‌ତି କାତା ମାନି ଆନେଞ୍ଜି ଅଟେ ରଃଅଞ୍ଜ୍‌ତି କାତା ମାନି ଆଃଏଞ୍ଜି, ମିରୁ ଦନ ଅଟେ ମୁଲାପେନୁ, ଇ ରିଃଆର୍‌ତି କାମ୍ବାରାଙ୍ଗା ଆଅନ୍ ମୁଃଏରି ।”

ମତ୍ର ପାଙ୍ଗାତି ଇମ୍ୱିନ୍ ହଲା ନିଞ୍ଜୁ ମାନ୍ନେ, ୱେଃଏ ହଡ୍ଡୁତାୱା ମ୍ଡାହ୍‌ପା ଆନେ, ଏୱାତିଦି ଜଦି ମୁଲାପେନୁ ଇହିଙ୍ଗ୍‌ତି ୱାନ୍ନା ହିନ୍ନେଞ୍ଜି, ଇଚ୍ଚେସି, ଏ ହିତେ ମାଞ୍ଜାଡ଼ି କିଅନ୍‌ତାତେରି, ଏୱାଞ୍ଜି ଏଚ୍ଚେ ମି କୁଲାଟି ଏଲୁ କିଆଦାଃଏଞ୍ଜି ?”

ମତ୍ର ମିରୁ ଦାନ ହିନ୍ନି ତୁକାତାୱା ମି ତିନ୍ନି କାଜ୍ଜୁ ଇନ୍ନା କିନ୍ନେ ଏଦା ମି ଗିଃଇ କାଜ୍ଜୁ ପୁଃନ୍ନାକାଦି, ଇହିଙ୍ଗିସି ମିରୁ ଦାନ ମ୍ଡାମି ହିଦୁ, ଏହେଙ୍ଗ୍ ଆତେସି ମି ମ୍ଡାମି ହିନ୍ନି ଦାନତିଦି ହୁଡ଼େଞ୍ଜାନି ଆବା ମିଙ୍ଗେ ପୁରସ୍‌କାର ହିଆନେଞ୍ଜି ।”

“ଦାଲ୍ଲାନିକି ତସ୍‌ପନ୍ ବାଗା ମିରୁ ଦର୍ମ କାମା କିଃଆଟୁ, ଏଦା କିତେସି ମି ସର୍ଗ ରାଜିତି ଆବାତାୱାଟି ମିରୁ ପୁରସ୍‌କାର ପାଃନେରି ।

“ୱାରାଆଞ୍ଜେନ୍ନି ତୁକାତାୱା କୁଟୁଗାଟାରି ଡେହେଙ୍ଗ୍ ମ୍ରୁମ୍ୱୁ ହାପ୍‌ଚ୍ଚାନ୍ ବାସାଆଃଆଟୁ, ଇନାକି ଏୱାରି ୱାରାଆଞ୍ଜେନ୍ନେରି ଇଞ୍ଜାନାହି ଦାଲ୍ଲା ନକେସ୍ ତସ୍‌ପନ୍ ବାଗାଟି ତା ମ୍ରୁମ୍ବୁ ହାପ୍‌ଚ୍ଚାନ୍ ବାସାଆଇନେରି; ନାନୁ ମିଙ୍ଗେ ନିଜ୍ଜା ୱେସ୍‌ପିଞ୍ଜା, ଏୱାରି ତା ପୁରସ୍‌କାର ପାଁଣ୍ଡାନ୍ନେରି । ମତ୍ର ମିରୁ ୱାରାଆଞ୍ଜନ୍‌ତି ତୁକାତାୱା ମି ତ୍ଲାଉତାୱା ନିଜ୍ଜୁ ଉସ୍‌ଦୁ ଅଟେ ମ୍ରୁମ୍ୱୁ ନଗ୍‌ଦୁ । ଇନିସ୍‌କି ମିରୁ ୱାରାଆଞ୍ଜେଞ୍ଜେରି ଇଞ୍ଜାନାହି ଦାଲ୍ଲା ପୁଃନ୍ନାକାରି, ମତ୍ର ତଞ୍ଜୁ ଆଃଆନ୍ ଆବା ମିଙ୍ଗେ ହୁଡ଼େଞ୍ଜାନେଞ୍ଜି, ଆଟେ ଏୱାଞ୍ଜି ମିଙ୍ଗେ ପୁରସ୍‌କାର ହିଆନେଞ୍ଜି ।”