Popular Bible Verses from JESAYA 60

Share

Katuka, Jerusarema, minikira ngwendi ezuva; uyerere waHOMPA kuna kukuminikira!

Nomuhoko ngadi wongorokera kouzera woge, Ano ohompa kokupuma kwezuva lyoge lyepe.

Nomuhoko dapeke ngagu di kudumika mundema, Nye ove ko, uzera waHOMPA ngau ku minikira; uyerere wekaropo lyaHOMPA ngau kara noge.

Nepata lyeeli lyenunu lyesupi ngali nenepa tali nkondopa ngwendi muhoko. Apa ngasi sika mo siruwo, ngani yi ninka yi horoke usimbu eyi. Ame nyame HOMPA! ”

“Ezuva kapi ngali kara hena uzera woge mutenya ndi kwedi uzera woge masiku; ame HOMPA nyame ngani kara uzera woge wanarunye; uzera wouyerere wange ngau ku minikira.

Mazuva goge geguwo ngaga haga. Ame HOMPA nyame ngani kara uzera woge wanarunye, au tema unene kupitakana ezuva nokwedi.

Ngo yi mona eyi, makura to zura ruhafo; ngo nkankama oku guna ku buruka. Emona lyonomuhoko ngava li reta koge; komafuta oko emona lyawo ngali wiza koge.

Tara mbinga nambinga o mone eyi yina kuhoroka; vantu woge kuna kulipongaika va wize kwawo! Vamati woge ngava tunda ure; vana woge wovakadi ngava va simba ngwendi vanona.

Vantu woge navenye ngava rugana youhunga, sirongo tasi kara sawo narunye. Nyame na va tapeka, nyame na va unga, va horore unene wange kwanavenye.

Mapiyagano kapi ngaga zuvhika mo hena; ehanaguro kapi hena ngali zonagura sirongo soge. Ngani ku popera tani ku gamene ngwendi ekuma; ove ngo panda nge morwa na ku parura.

Mutenya nomasiku marungavero goge ngaga zeguruka, ohompa wonomuhoko va wape kukuretera maugawo gawo.

Yigendo yoyinene yonongameru ngayi wiza, yi tunde koMidiyani naEfa. Ngayi tunda koSeba, yi rete ngorodo nomanganganga gokututumikidisa. Vantu ngava sanseka mbudi zongwa zeyi ga rugana HOMPA!

HOMPA ta tantere Jerusarema asi: “Vanayirongo yiwo ngava tungurura makuma goge, ano ohompa vawo ngava ku ruganena. Ame kwa ku futisilire mehandu lyange, nye ntaantani tani ku zaverere ni ku fire nkenda.

“Sitata ove kapi ngava ku zumba hena o kare mburundu zomawoko‐woko. Ngani ku zerura tani ku fuura, ngo kara evega lyoruhafo narunye‐narunye.

Nomuhoko nohompa ngava ku takamesa moomu a rere zinya munwendi. Ngo divire po asi ame HOMPA nyame na ku parura, hena asi Karunga gononkondo gwaIsraeli ga ku mangurura.