بعد ازی که پیشوایونِ عالی مقام قد رِیش سفیدا جم شُده دَ بَین خُو مشوَره کد، اُونا یگ مِقدار پَیسه بَلدِه پَیرَدارا دَد و گُفت: ”شُمو بُگِید که ’یارای شی دَ وختِ شاو اَمَده اُو ره دُزی کد دَ غَیتِیکه مو خاو بُودی.‘ و اگه اِی توره دَ گوشِ والی رسِید، مو اُو ره راضی مُونی و شُمو ره از جنجال دُور نِگاه مُونی.“ پس اُونا پَیسه ره گِرِفت و امُو رقم که بَلدِه ازوا گُفته شُدُد، امُو رقم کد. اِی قِصّه تا اِمروز دَ بَینِ یهُودیا گُفته مُوشه.