Popular Bible Verses from Ubwandilo 39

Share

U MWENE akaba nu Yosefu po akamwavwa ukuti ivintu vyosi vimwendele akiza bulo. Akikalagha munyumba iya Potifala usongo uwamu Ijiputi

Po u Potifala akabika ukatundu wache wesi munyobe izya Yosefu, sona atakapalamaziwapo nachimochimo, loli chene ichakulya chicho akalyanga. U Yosefu akaba mulumendo wakuboneka akiza nkani.

Po umulindilili uwa jele akamubika u Yosefu pakuba wakwenelezya abakayidi abanji, poka na vyosi vivyo vikabombiwa mujela mula.

Panapo na panapo akamusenda u Yosefu nukumwighalila mujele mumo abakayidi abamwene aba mu Ijiputi bakasungiwangamo. Loli bo u Yosefu ali mujele mulamula, u MWENE akaba nawe. Akamupelela ichisa umwakuti umulindilili uwa jele akahoboka nawe.

Bo pachilapo akabalilo, umuchi uwa songo wache akanda pakumunyonywa u Yosefu. Po umukolo yula akamwitizya u Yosefu ukuti aghone nawe. Loli u Yosefu akakana nukumubuzya umuchi uwa songo wache ukuti, “Teghelezya, nkimba utazimenye ukuti usongo wane ansubiye pakundekela ukatundu wache? Atakupalamaziwapo nachimochimo chicho chili muno pachifukwa ichakuti indi pano. Indi nu bulaghili ubukulu nkani munyumba iyi ukumuchila yuyo, sona atanyimitepo nakamo akantu, loli wewe wemwene. Po zingaba bulibuli ukuti indowe ngati bunubu, sona nukunanga kwa Chala?”

Loli isiku limo u Yosefu akinjila munyumba pakubomba imbombo yache, sona patakabapo nayumoyumo uwamwabo uyunji munyumba mula. Umukolo yula akalema inkazo iya Yosefu nukuti, “Ghona nane.” Loli u Yosefu akafyuntumula nukumuleka alemeleye inkazo munyobe, po akachimbila nukufumila kuzi.