Popular Bible Verses from 1 Timoteo 2

Share

Anaod, sya tamo' a Dios tan sayan-saya ya a mangingituno nin tutawo konan Dios. Sya a tawo a si Jesus, a syay Cristo nin nibi na a byay na nin ipambot na sa sarba nin tutawo. Edet, sa manepeg nin panaon, pinatutu'wan nan Dios a isalba na a tutawo.

Ket anaod, sayti a bubibilin ko komo. Si mu'na, matkap a pakisalamatan tamoyay Dios para konran sarban tawo tan ipasisinga'do tamo sara nin ikidawat kona. Idasalan tamo sara a mampag'uray kontamo tan saray raruma et nin main nin pakauray kontamo ta pigaw nin sa pag'uuray ra, ket mabyay atamo nin matinek tan mabista a kapapa'sar leleg a man'ituluy-tuloy tamoy mangwa' nin saytaw say kumana' konan Dios tan konran kapada tamon tawo.

Ket anaod, wanti a rabay ko: Sa adtiman nin mididinep kamo, ket dumasal saraynamaet kumon a lulalaki. Matkap ran ita'gay a gamet ran dumasal nin maringgas a byay ra tan kasa nin sakit-nakem tan sager ra sa kapada ran tawo. Ket saray bubbayi anamaet, matkap a say pisisket ra, manepeg nin maibagay konra tan ambo' nin nalabas-labas a kikit. Andi' ra nin pasubrawan a pammabistan bakas nin sabot ra nin parayo sa tutawo tan andi' ra nin labasen a piaalahas nin balitok o mablin bubato o say pisisket nin mabli nin sayti a puon a raywen sara. Ana edet, say puon ket say maabig a gawa'-gawa' ra ta sayti a maibagay konran bubbayi nin wanra ket makaDios sara.