Popular Bible Verses from 2 CORINTIOS 6

Share

Was tak nicha̱kꞌ aj niminel reh Jesus, jeꞌ ricab nok maꞌ eta riban chi enatuna̱ꞌ wach jenaj bo̱yex chꞌi̱l jenoꞌ cawa̱y chi camanic ruꞌum chi maꞌ jenaj ta wach quinoꞌjbal jeꞌ woꞌ reꞌ til nikꞌor aweh tak i hin chi reꞌ hat-tak ma̱kꞌinej tak awi̱b ru̱cꞌ quinoꞌjbal take maꞌ quiniminic ta reh Jesus. Ma̱ban tak chi jeꞌ reꞌ ruꞌum nok jenoꞌ cꞌacharel reꞌ coric wach nbanic chiwach i Dios maꞌ jaruj ta eriban chi erijunehtej ri̱b rinoꞌjbal chꞌi̱l jenoꞌ cꞌacharel maꞌ riban ta i coric chiwach i Dios. Jeꞌ woꞌ reꞌ ncꞌuluric ru̱cꞌ i sakom, maꞌ jaruj ta woꞌ erituna̱ꞌ ri̱b chꞌi̱l i kꞌekom.

Jeꞌ woꞌ chic, chipam i Lokꞌ laj Pa̱t reꞌ nlokꞌonjic wi̱ꞌ wach i Dios maꞌ eta riban chi ewoꞌ quiꞌo̱j cojorok ar take tiyo̱x eh ar enlokꞌonjic quiwach. Jeꞌ woꞌ i Dios maꞌ riyew ta kꞌab chi reꞌ hoj aj niminel enkatuna̱ꞌ wach i kanoꞌjbal chꞌi̱l take aj lokꞌonel wach tiyo̱x maj pa ricorquilal reꞌ hoj wilco̱j chi jeꞌ ricab i Lokꞌ laj Pa̱t reꞌ nlokꞌonjic wi̱ꞌ wach i Dios reꞌ cꞌachlic chi junelic sakom, jeꞌ ricab rikꞌorom cho chipam i Lokꞌ laj Hu̱j tzꞌihmbimaj wi̱ꞌ riCꞌuhbal. Ar jeꞌ wili rikꞌor i Dios: “Reꞌ hin Dios naniwihꞌic chi quixilac take quiniminic wi̱n eh nawilom take reh chi naquiwihꞌic chi suk. Chi jeꞌ reꞌ, reꞌ take reꞌ xa reꞌ woꞌ i hin naqui̱nquicojom chi hin quiDios eh reꞌ take reꞌ nacaꞌnam woꞌ chi nitinami̱t take, nqui rikꞌor.

Ruꞌum aj woꞌ reꞌ, reꞌ Dios jeꞌ woꞌ wili rikꞌorom cho pan Lokꞌ laj Hu̱j reꞌ tzꞌihmbimaj wi̱ꞌ riCꞌuhbal: “Hat-tak nitinami̱t, telen tak chi quixilac take cꞌacharel reꞌ aj lokꞌonel tiyo̱x take, ma̱ban jenaj wach anoꞌjbal tak quichꞌi̱l. Jeꞌ woꞌ ma̱ban chic aweh tak i cꞌahbilal laj noꞌjbal eh chi jeꞌ reꞌ, reꞌ hin etinicꞌul tak wu̱cꞌ chi nitinami̱t, nqui rikꞌorom. Ar woꞌ chipam i Lokꞌ laj Hu̱j reꞌreꞌ, reꞌ kAja̱w Dios reꞌ kꞌe̱ꞌ rinimal wach rajawric jeꞌ wili rikꞌorom cho: “Reꞌ hin nanibanam chi hin awAja̱w tak eh chi jeꞌ reꞌ, reꞌ hat-tak na̱cahnic tak chi hat-tak wacꞌu̱n wixkꞌu̱n, nqui rikꞌorom.

Jeꞌ woꞌ reꞌ i Jesus reꞌ Pahbamaj chi Kꞌatal Kꞌoric, reꞌreꞌ maꞌ rijunehtej ta nechꞌ ok ri̱b chꞌi̱l i aj Yahm reꞌ ribihnej woꞌ chi Welyal eh jeꞌ woꞌ reꞌ i aj niminel reh Jesus maꞌ jenaj ta wach rico̱ch naricꞌulum chꞌi̱l take cꞌacharel reꞌ maꞌ nca̱j ta quinimem i Jesus.