Popular Bible Verses from 2 CORINTIOS 4

Share

Nikꞌor reꞌreꞌ maj reꞌ take chaj bih nkilow china̱ acꞌal wili jeꞌ ricab take tiꞌcꞌaxic, maꞌ nkacoj ta kacapew-bal ru̱cꞌ ruꞌum chiꞌnchel take xa chaj bih jaric nilmijic wach yuꞌna xa narisahchic woꞌ quiwach, ra̱j nchel chiri̱j take maꞌ nilmijic ta wach jeꞌ ricab i lokꞌil nariyeꞌeric, til ar nkachꞌica̱ꞌ kacapew-bal ruꞌum nok reꞌ cok reꞌ maꞌ jaruj ta sahchel wach.

Ruꞌum aj reꞌ, reꞌ hoj maꞌ nkapohꞌaj ta kacꞌux eh to̱b ta woꞌ nchel cꞌahchiꞌ roquic cho rirejbic i katiꞌjolal ru̱cꞌ i camanic cꞌahchiꞌco̱j, wilic jenaj chic acꞌ cꞌacharic pan ka̱mna eh reꞌ cꞌacharic reꞌreꞌ eli̱c i kꞌi̱j cꞌahchiꞌ riꞌacsjic wach. Jeꞌ reꞌ kꞌuruꞌ maꞌ nkapohꞌaj ta kacꞌux maj reꞌ nicꞌ paꞌ ti nimal tiꞌcꞌaxic nkacꞌul chipam kacꞌacharic reꞌ xa cꞌuhlel woꞌ ti take, xa rehreh cꞌahchiꞌ rijohsam wach i rinimal wach kalokꞌil nariyeb keh i Dios eh eli̱c johtic riban wach.

Reꞌ hin nikꞌor aweh tak i wili maj to̱b ta xa sutumaj chic ki̱j ru̱cꞌ cꞌaxquilal nchalic chi kana̱, reꞌ rajawric i Dios maꞌ jancꞌal ta hoj ricana̱b chi maꞌ ta nak chic enkarak kelbal chipam take cꞌaxquilal reꞌreꞌ, on to̱b ta woꞌ wilic pech maꞌ nkarak ta nak chic chiri̱j chaj bih nakaꞌnam chipam jenoꞌ cꞌaxquilal, reꞌ rajawric i Dios xiban chi maꞌ xkakꞌeb ta kacꞌux chi nakesmejic chipam i cꞌaxquilal reꞌreꞌ. Wilic woꞌ pech nkacꞌul chi reꞌ take tinamit kojquitahkej chi ribanaric tiꞌcꞌaxic keh xa reꞌ laꞌ reꞌ rajawric i Dios xiban chi maꞌ xkicꞌraj tak ki̱b chi xakutquel ti ki̱b chipam i tiꞌcꞌaxic. Wilic woꞌ pech xojquichꞌeylom take kaj ixowonel cu rehtal xa cucꞌtak nak chic maꞌ kojquicansaj xa reꞌ laꞌ rajawric i Dios xojritoꞌbej woꞌ chi maꞌ xojquicansaj ta.

Reꞌ aj chic risakomsjic pa̱m kacapew-bal xiban i Dios i hoj reꞌ xa jeꞌ ti ricab jenoꞌ tzꞌak acꞌal xun, reꞌreꞌ xbanjic reh chi reꞌ rinimal wach ajawric chi ribanaric i camanic xiyew keh i Dios, encꞌutunic lok chi ar ru̱cꞌ nchalic eh chi maꞌ reꞌ ta nchel ku̱cꞌ i hoj.

Reꞌ take cꞌacharel reꞌreꞌ maꞌ nca̱j ta quinimem i cꞌuhbal nkꞌoric chiri̱j i kAja̱w Jesus ruꞌum nok reꞌ aj Yahm reꞌ ajabe̱s nchoponic na̱ i cꞌahbilal wach noꞌjbal china̱ acꞌal ximoysaj wach quinoꞌjbal chi rirakmajic chiri̱j risakomal wach i holohic laj cꞌuhbal nkꞌoric chiri̱j rilokꞌil wilic i Jesus reꞌ Pahbamaj chi Kꞌatal Kꞌoric eh reꞌreꞌ manlic aj cꞌuhtunel reh nicꞌ wach riminjilal i Dios.

Jeꞌ reꞌ ajic reꞌ hoj cꞌahchiꞌ kakꞌorom aweh tak i cꞌuhbal chiri̱j i Jesus reꞌ Pahbamaj chi Kꞌatal Kꞌoric, ruꞌum nok reꞌ Dios reꞌ xkꞌoric cho chi nariwihꞌic i sakom reꞌ narisakomonic woꞌ pan kꞌekom, reꞌ woꞌ reꞌ xsakomsjic pan kacapew-bal i hoj. Jeꞌ aj reꞌ kꞌuruꞌ reꞌ hoj xsakomsjic pa̱m kacapew-bal reh chi reꞌ hoj enkasakomej lok wach i rinimal wach rilokꞌil i Dios reꞌ xcꞌuhtunic woꞌ ru̱cꞌ i Jesus.