Popular Bible Verses from โรม 6

Share

กรานา ลาฆู ดูซา เตอ_ ญา บรี รือฆา อูปัฮ นะ ญา_ ฌาดี จะ_ กีตา นะ กือนา ลาฆู มาตี. ตาปี ตูฮัด เดะ อาตัซ เตอ_ ญา ฮาลัย บรี ซือลามัจ กะ กีตา_ บรี กีตา อาดา ฮีโดะ ซูโงฮ ซือลาลู_ ลือกัจ บือซามา ฌางัน เยซู คริด_ ตูฮัด นะ กีตา เลอ.

กะฆีเตอ_ ลาฆู ดูซา นะ เตด บือเลฮ ฮูโกบ กาเญา ลาฆี เลอ. ซาเบะ กาเญา เตด ดูโดะ เดะ บาวัฮ ปือมือเลา ฮูโกบ_ ตาปี อาดา ดูโดะ เดะ ลาฆู_ นู ตูฮัด ฮาลัย บรี ซือลามัจ ดัฮ เลอ.

กะฆีเตอ_ นู กีตา ซือลับ เดะ อาเย ดัฮ_ กีตา กือนา ตานัม บือซามา ฌางัน เยซู_ มาโซะ บือซามา เดะ ลาฆู นู ญา มาตี ดัฮ_ บีดา กีตา นะ ตูโรจ ลาฆู ฮีโดะ นู บารู_ บือกะ ซือรูปา นู อาโปก เดะ อาตัซ_ นู มือฆัฮ ซูโงฮ_ บือเลฮ บูวัจ บรี เยซู คริด_ ฮีโดะ ปาเระ เดะ มาตี ดัฮ.

ฌางัน ซรัฮ โกะ กลือกะ เดะ ญาวา นะ กาเญา_ บรี กะ ลาฆู ดูซา_ ฌาดี ซือบารัก นู ซูโรฮ บูวัจ ลาฆู นู ฌาฮัจ. ตาปี กือนา ซรัฮ ญาวา นะ กาเญา_ กะ ตูฮัด บือซัยํ เดะ อาตัซ_ บือกะ ซือมียา นู ฮีโดะ ปาเระ เดะ มาตี ดัฮ. กือนา ซรัฮ โกะ กลือกะ เดะ ญาวา_ กะ ตูฮัด ฌูฆา_ ฌาดี ซือบารัก นู ซูโรฮ บูวัจ ลาฆู นู กือนา เดะ ฮาตี นะ ตูฮัด.

กีตา ตาฮู จะ_ ญาวา นู ลามา นะ กีตา อีตู_ กือนา กาจิก เดะ กายู ปลีตัก ฌางัน เยซู ดัฮ_ บีดา นะ บูวัจ บรี ปรางัย นู บือดูซา_ นะ บือนาซา ฮาบิฮ บูวัก. กะฆีเตอ_ กีตา นะ เตด ฌาดี ปราโซฮ นะ ลาฆู ดูซา ลาฆี เลอ.

ซือรูปา กะฆีเตอ ฌูฆา_ กาเญา กือนา บือกีรา จะ_ กาเญา มาตี บรี ลือปัซ เดะ ฮูโกบ นะ ลาฆู ดูซา ดัฮ_ ตาปี อาดา ฮีโดะ กรานา ตูฮัด เดะ อาตัซ_ ลือกัจ บือซามา ฌางัน เยซู คริด เลอ.

ดัฮ ฌาดี กะฆีเตอ_ กีตา นะ มือเลา นามา? กีตา นะ บูวัจ ดูซา ลาฆี เฆอ_ บีดา ตูฮัด นะ ฮาลัย บรี ซือลามัจ กะ กีตา_ บือตามัฮ บาญะ? ฌางัน บรี ฌาดี กะฆีเตอ เลอ. ลูมอฮ กีตา ซือรูปา มาตี_ ลือปัซ เดะ ฮูโกบ นะ ลาฆู ดูซา ดัฮ. กะฆีเตอ_ กีตา นะ ลาดัจ บูวัจ ดูซา ลาฆี_ บือเลฮ กะฮามี เลอ?

กาเญา เตด ตาฮู เฆอ_ จะ_ ดัฮ กาเญา ซรัฮ ญาวา นะ กาเญา บรี ฌาดี ปราโซฮ_ บูวัจ ตูโรจ กะ ซือมียา ดีฮา เตอ_ กาเญา โปด_ ฌาดี ปราโซฮ นะ ซือมียา_ นู กาเญา บูวัจ ตูโรจ อีตู เลอ? นะ ฌาดี ปราโซฮ บูวัจ ตูโรจ กะ ลาฆู ดูซา_ นู บาวา บือปี รอจ กะ มาตี_ เฆอ จะ_ ฌาดี ปราโซฮ บูวัจ ตูโรจ กะ ตูฮัด_ นู บาวา บือปี ฌาดี ซือมียา บาฌิ ตือปัจ ฌางัน ตูฮัด ดัฮ เลอ.

ตาปี บรี ซือลามัจ กะ ตูฮัด เลอ. กรานา กาเญา นู กาลา ดูลู_ ฌาดี ปราโซฮ บูวัจ ตูโรจ กะ ลาฆู ดูซา เตอ_ กาเญา โปด_ บือเลฮ มือนีงัย ปือนอฮ เดะ ฮาตี_ กะ ปือมือเลา อาฌัยํ อีตู_ นู ซรัฮ บรี กะ กาเญา ดัฮ. กาเญา ลือปัซ เดะ ฮูโกบ นะ ลาฆู ดูซา ดัฮ_ ฌาดี ปราโซฮ นู บูวัจ ตูโรจ กะ ฮาตี นะ ตูฮัด ดัฮ เลอ.