Popular Bible Verses from มาระโก 6

Share

อาดา ซือมียา บาญะ ตืองัฮ ปี มาแรฮ_ ฌู จะ_ เยซู ฌางัน โกะ มูเระ นะ ญา_ ฮอย จือลัฮ นะ มากัด. กะฆีเตอ_ เยซู มือเลา ฌางัน ลูมอฮ มูเระ จะ_ “โฌฮ_ ลูมอฮ กาเญา มาแรฮ_ ซา กาเญา_ บราดู รือมัย ดีกิ_ เดะ ตือปัจ ฮอย ซือมียา.”

ตาปี_ เยซู มือเลา ฌางัน กูญา อีตู จะ_ “โกะ ซือมียา ราตาๆ นะ ตูเฮะ_ กะ ซือมียา ตูโดฮ ลาฆู นะ ตูฮัด เตอ_ ตาปี เดะ ตูโปะ นะ ญา_ เดะ โกะ นะบรานะ นะ ญา_ เดะ รูมัฮ นะ ญา โปด_ กูญา นะ เตด ตูเฮะ ลาลู เลอ.”

ตานา เยซู ตูโรด เดะ ปราฮู_ ญา ลีฮัจ ลูมอฮ ซือมียา บาญะ. ญา ตือจีฮัด กะ ลูมอฮ กูญา_ ซาเบะ กูญา อีตู_ ซือรูปา กะ กาวัด กาเมก_ ฮอย ซาปา ปือบือลา. กะฆีเตอ_ ญา ฮึนตะ นะ อาฌัยํ กูญา_ บาญะ ลาฆู.

กะฆีเตอ_ เยซู นะ บูวัจ ลาฆู นู มือฆัฮ_ เดะ ตูโปะ อีตู โปด_ ฮอย เตด บือเลฮ ดัฮ_ ตาปี ญา บอฮ ตางัน_ เดะ ซือมียา ซาเกะ_ บรี ซือนัง_ เตด บราปา บาญะ อูรัก. กะฆีเตอ_ เยซู ญา ปือและ ฮาตี_ กรานา ลูมอฮ อีตู เตด ปือจายา. กะฆีเตอ_ ญา ตรือเบะ ปี อาฌัยํ_ เดะ ตูโปะ อาซิกๆ ปูลัก.

กะฆีเตอ_ เยซู ญา อาเมด ตือโปก โรตี ลีมา กือโตน_ ฌางัน อีกัด ดูวา อีโกยํ อีตู_ ญา ลางอฮ ลีฮัจ กะ ลาแงะ_ บรี ซือลามัจ กะ ตูฮัด เดะ อาตัซ. กะฆีเตอ_ ญา ลือแปะ ตือโปก โรตี_ อูโญะ กะ โกะ มูเระ_ บรี กูญา นะ ฮาฆิ กะ โกะ ซือมียา ซือมูฮา. อีกัด ดูวา อีโกยํ ซีงี_ ญา ปาฮาฆิ ปูลัก_ บรี กะ โกะ ซือมียา ราตาๆ. กูญา ซือมูฮา_ ปาคัจ มากัด กือญัง ฮาบิฮ ดัฮ. กรือดะ ตือโปก โรตี_ กรือดะ อีกัด_ นู ลือเบฮ เดะ มากัด เตอ_ กูญา มูงอจ_ บือเลฮ ดูวา บือลัซ บีฌี ซูเปะ_ ปือนอฮ ฮาบิฮ.