Popular Bible Verses from 1 Pedro 2

Share

Pero hikam u lahe hide a pinile nu Diyos, a magin saserdote na a magserbi tu tatahoden a Hare, essa a bansa para tu Diyos. Pinile kitam nu Diyos a magin sakup na sakay mángpakapos-pos tu makataka-taka hide a ginimet na a mágkaganda. Siya be u náng agton nikitam tu makataka-taka a demlag na nikuna a katoy kitam palla tu kadiklámman.

Ti Cristo ay naparusaan dipo tu kasalanan tam. Nepako siya tu kudus tánni hummintu kitamon tu págkasala a konna tu patay a awan dán magkasala, sakay sumunud kitamon tu kagustuwan nu Diyos. Sakay dipo tu talingu na hide ay nagpiyya kitamon. Dipo kumán kam a tupa a nágketawtaw pero nadid ay inipun kamon a huway nu Diyos tu pamamag-itan ni Jesus a pastol tam a mággalaga tu kaliduwwa tam.

Tu itod ay bakán kam palla a sakup nu Diyos pero nadid ay sakup na kamon. Awan nikam tu itod u kagbi nu Diyos, pero nadid ay hod dán nikam u kagbi na.

Dapat kam a mauwaw tu Upos nu Diyos, konna tu kákkauwaw nu anak ti gatas, tánni bumegsák u pánnampalataya moy hanggan matanggap moy u kaligtasan.

Kákkapatkákka ko hide, bakán a munduwáy u permamente tam a págyanan nan kumán kitam la a bisita ti iye. Kanya mákkekagbiyák nikam, adággen moy dán u mágkadukás a kagustuwan nu bággi moy dipo ina u mangsida tu kássunud moy tu Diyos. Dapat kitam a mabiyag ti maayus tu atubang nu Hentil hide, ta maski ni bintangán dikam ti madukás, pero ketan de u mágkaganda moy a gimet ay magpure hide tu Diyos káddemát nu aldew a kássole na.

Nadid, ay tehhod kamon a bigu a biyag a gábwat tu Diyos. Sakay nagkaessa kam a nagin konna tu essa a Templo. Kumán kam a bito a biyag a ginimet a templo na. Konna kam be tu essa a saserdote a nelaan para tu Diyos. U alay a ispiritwal a makasaya tu Diyos ay u págserbi moy nikuna alang-alang ni Jesu-Cristo.

Kanya adággen moy dán u atanan a mágkadukás, u pakándaya, pakánwari-ware, kákkaiyamut, sakay pakán upos ti awan ti pinagseserbiyan tu agum.

Kanya umadene kam nikuna; siya u mangatád ti biyag sakay siya u konna tu bito a inadiyan nu tolay hide pero pinile nu Diyos a pinakamahalaga tu pangileng na.

Mabiyag kitam a konna tu tolay hide a tehhod a kalayaan. Pero diyan moy gimitán u kalayaan a iye tu pággimet ti madukás nan mabiyag kam bilang alipin nu Diyos.

Gusto nu Diyos a gimitán tam u tama tán tumahan u tolay hide a apehet ti pággisipan a mágga-upusán ti baka-bakán kontara tu upos nu Diyos.