Popular Bible Verses from Филипын оліссезлӧ 4

Share

Нем понда эдӧ тӧждісьӧ. Сы туйӧ пыр кеймӧ, кеймисьӧ Еныслӧ, буркывтӧ Сійӧ. Быдӧс, мый тіянлӧ колӧ, висьталӧ Сылӧ.

Сэк Еныслӧн сетӧм лӧньыс видзас тіянлісь сьӧлӧммезнытӧ да мывкыднытӧ Кристос Исусыскӧт ӧтлаасьӧмӧн. Еныслісь сійӧ сетӧм лӧньсӧ мортыс и вежӧртны оз вермы.

Воннэзӧ, медбӧрын кора, авйӧ дзир сы йылісь, мый быль, мый туйӧ, мый веськыта, мый сӧстӧм, мый морт сьӧлӧм сьӧрті да мыйсянь долыт. Авйӧ дзир сы йылісь, мыйсянь бур петӧ да мый понда позьӧ ошкыны.

Кристос Исусыскӧт ме быдӧс верма, Сія менӧ вынсьӧтӧ да.

Пыр лоӧ гажаӧсь, тійӧ эд олат Дӧсвидзисьыскӧт ӧтлаасьӧмӧн. Мӧдпырись шуа: лоӧ гажаӧсь.

И менам Енӧ сетас тіянлӧ быдӧс коланасӧ Кристос Исус отсӧтӧн. Югьялан Еныслӧн эд быдӧс эм.

Керӧ, мыйӧ тійӧ велаліт, мый кыліт, адззыліт да босьтіт месянь. Сэк лӧньсӧ сетісь Еныс лоас тіянкӧт.

Ась быд мортыс адззӧ тіянлісь рама видзсьӧмнытӧ. Дӧсвидзисьыс эд матын ни.

Кужа овны етшанас, кужа овны унанас. Ме быдӧс адззылі, быдӧсӧ велалі: пӧттӧдз сёйны и тшыгьявны, кужа унасӧ видзны да етшанас тырмӧтчыны.

Этадз баита не сысянь, жыв меным колӧ отсӧт. Ме велалі овны сійӧн, мый менам эм.