ГӀизраилазда лъазабе, нахучирахъалда жанибе тӀезе бищун лъикӀаб зайтуналъул нах босун щвезабеян, кидаго нахучирахъалда канлъи бакун букӀине. Гьаруницаги гьесул васазги цӀунизе ккола КъотӀиялъул гъамас нахъа лъураб пардавалда цебе бугеб нахучирахъалда бакараб цӀа, ДандчӀваялъул Чадиралъуб БЕТӀЕРГЬАНАСДА цебе маркӀачӀудаса бахъараб рогьинегӀан канлъи свинчӀого букӀине. ГӀизраилаз ва гьезул наслабаз даимго цӀунизе ккола гьеб низам.