Popular Bible Verses from ROMANOS 7

Share

Ta ndixaꞌvi ni Ndioxi xaꞌa chiñu ya xa̱a súvi Tata yo Jesucristo! Chi iindaa ra ikán ku ra kuchiñu sikaku yoo nuu ndee ya väꞌa. Ta vitin ku̱ndaa ini i, ni ndinuꞌu ni va ini i kúni i xaa súvi i ley Ndioxi, sundi xaꞌa ya kúu i ra ivi yóꞌó, yakan vita ni i nuu kuachi, kúchiñu ya xáꞌnda chiñu ya nuu i.

Xa kúndaa va ini i, chi köo mií ya vaꞌa íyo vi ikin kuñu i, xaꞌa ya kúu i ra ñuu ivi yóꞌó. Saa chi ya vaꞌa ku ya kúni i ikan va i, sundi köo mií ndee ikin kuñu i ya ikan ya vaꞌa.

Ta köo íkan i ya vaꞌa, ya kúni i ikan i. Ya väꞌa, ya köo kúni i ikan i, ku ya íkan ka i.

Tá íkan i ya väꞌa ya köo kúni i ikan i, ta süvi yeꞌe ku i íkan saa, kuachi i, ya táku ini i ku ya íkan saa xiꞌin i.

Ta xa ku̱ndaa ini i ya ndixa kua ndóꞌo i saa: chi tá kúni i ikan i ya vaꞌa, ta ya väꞌa íyo xiꞌin i kua köo táxi ikan i saa. Ndinuꞌu ni va ini i kúsini i xíni i ley Ndioxi.

Tá tu íkan i ñaꞌa ya väꞌa, ya köo kútoo i ikan i, ta ya ñaa kúni kachi ya: kúndaa ini i ya ndaa ni ku ley Ndioxi.