Popular Bible Verses from ROMANOS 5

Share

Ta süvi saa ndi̱kan Ndioxi, chi si̱naꞌa ra mií ra ya kúꞌvi ni ini ra xíni ra yoo, vani ndee ni káa kuachi yo, ta xaꞌa ya kúꞌvi ni ini ra xíni ra yoo, yakan ti̱ꞌvi ra Jesucristo ki̱xi ra ndi̱xiꞌi ra xaꞌa yo, ni yo ivi kuachi ndi̱xiyo yo.

Ta ni süvi ya mani uun ku ya ndáa ini yo ya sixinu Ndioxi ya ndi̱kaꞌan ra xiꞌin yo, chi ndee ni si̱niꞌi ra Tachi I̱í ra nuu yo, nda tá kuꞌva chútu ndaa tikuii ini iin vaso, ndakua xíta ndaa rá yuꞌu ya, kuꞌva saa íkan Tachi I̱í Ndioxi xiꞌin yo, iin síkutu ndaa ya mií yo xiꞌin ya kúꞌvi ni ini ra xíni ra yoo.

Ta süvi ndisaa xaꞌa ya vaꞌa yóꞌó ku ya kúsini yo, chi kúsini tu yo tá vaxi tindoꞌo nuu va yo. Saa chi xíni yo ndiꞌi tindoꞌo ndóꞌo yo ta xáa ndee ka ya ini yo xiꞌin ya uꞌvi vaxi nuu yo, ta ndee ka ndíkundikun yo ichí Ndioxi. Saa chi tá kúndee ini yo, xáꞌa ndee ini yo xaꞌa ndá ka ya uꞌvi vaxi nuu yo, ta saa kua, ndúu yo naꞌa na íyo ndúvi ikan ya vaꞌa, ya kúni mií Ndioxi. Tá íkan yo saa, ta kúndaa teꞌe ini yo ya ndixa kua sixinu ndiꞌi Ndioxi ya ndi̱kaꞌan ra xiꞌin yo.

Xaꞌa ya kándixa yo Tata yo Jesucristo, ta Ndioxi ndása ra mií yo ndúu yo naꞌa, na vaꞌa, na íin tá íin naꞌa na köo ka kuachi kúu mií nuu ra, chi Tata yo Jesucristo ku ra si̱kitaꞌan mani yoo xiꞌin Ndioxi, ndi̱kundoo vaꞌa yo xiꞌin ra. Saa tu xaꞌa ya kándixa yo Jesucristo kua ndi̱niꞌi uun yo nuu ndi̱kiꞌvi yo ndi̱kitaꞌan vaꞌa ni yo xiꞌin Ndioxi, ta ni küxika ka yo nuu ra. Saa kúsini ni yo chi kúndaa teꞌe ini yo ya koo yo xiꞌin ra nuu kuni yo ya chee ni kúu mií Ndioxi.

Kivi tá xi̱ndoꞌni yo ndaꞌa kuachi ta köo ndíkuchiñu yo saña yo mií yo ndaꞌa ya. Ni köo ndi̱kuchiñu yo sikaku yo mií yo, nda kivi tá chi̱tuni mií Ndioxi, saa kua ki̱xi Jesucristo ndi̱xiꞌi ra xaꞌa kuachi yo.

Ta ndisaa ka vi vitin, sïndoꞌo ka Ndioxi yoo kivi tá ná taxi ra kuachi xaꞌa ndiꞌi ni kúu na ñuu ivi yóꞌó, xaꞌa ya ndi̱xiꞌi Jesucristo xaꞌa yo kua nda̱sa ra mií yo ndu̱u yo tá íin naꞌa, na köo ka kuachi kúu mií nuu Ndioxi.

Xaꞌa ya köo ndíxiin iin taa kuni soꞌo ra ya ndi̱kaꞌan Ndioxi xiꞌin ra, xaꞌa ya ikán kua ndu̱u na, naꞌa na kúu mií kuachi nuu Ndioxi. Ta saa ni xaꞌa ya vaꞌa ni xi̱ni soꞌo iin taa ya ndi̱kaꞌan Ndioxi xiꞌin ra, xaꞌa ya i̱kan ra saa, ta kuaꞌa ni na ñuu ivi ndi̱niꞌi ya vaꞌa sata ra. Xaꞌa ya ikán kua ndasa vaꞌa ra na, ndu̱u na na vaꞌa, na köo ka kuachi kuu mií nuu ra.

Ta saa ni, süvi ndisaa ya yóꞌó ku ya táxi kusini yo, chi kúsini ni yo, ya xáa kaꞌnu ini Ndioxi xaꞌa yo. Ta xaꞌa ya i̱kan Tata yo Jesucristo xa̱a súvi ra chiñu ya si̱kitaꞌan mani ra yoo xiꞌin Ndioxi, ta vitin ndi̱kundoo vaꞌa yo xiꞌin ra.