Popular Bible Verses from ROMANOS 12

Share

Ta köo ndo tá kuꞌva íyo na ñuu ivi yóꞌó, vaꞌa ka nditaxi ndiꞌi ndo mií ndo ndaꞌa ra ná ndinama ra ya xínituni ndo. Ná nduxaa kuꞌva ndíkani ini ndo. Saa kuchiñu ndo kundaa ini ndo, ta xaa súvi ndo ya kúni mií ra, ta saa kua ikan ndo ya vaꞌa, ya ndaa, ya xáa sini ndo ini ra.

Ñani yo xiꞌin kuꞌva yo, xíkan ni i ya mani nuu ndo ya ná nditaxi táku ndo mií ndo ndaꞌa Ndioxi. Soko ndiꞌi ndo mií ndo nuu ra. Tá íin naꞌa na ií, na síkusini ni ini ra, saa koo ndo. Nditaxi ndiꞌi ndo mií ndo ndaꞌa ra xaꞌa ya kúndaꞌvi ni ini ra xíni ra ndóꞌo̱. Tá íkan ndo saa ta xáa kaꞌnu ni ndo ra, ta ya ñaa ku mií ya ndixa ni ka ndáa yaꞌvi nuu ra.

Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

Täxi ndo kuchiñu ya väꞌa nuu ndo, ya vaꞌa ku ya xíniñuꞌu ndo ikan ndo. Tá íkan ndo saa, ta síndiꞌi xaꞌa ndo ya väꞌa.

Kuꞌvi ni ini ndo kuni taꞌan ndo, tá kuꞌva kúꞌvi ini ndo xíni ndo ñani ndo án kuꞌva ndo na ka̱ku xiꞌin ndo. Chinuu vaꞌa ndo tuꞌun na taꞌan ndo, saa xaa toꞌo taꞌan ndo.

Tá kúꞌvi ni ini ndo xíni taꞌan ndo, ta ndixa ndinuꞌu ini ndo kuꞌvi ini ndo kuni taꞌan ndo. Kundasi nuu ndo kuni ndo ya väꞌa, ta chikaa ni ndo ndee ya kundikun ndo ya vaꞌa.

Xaꞌa ni ndo ndee, nduku ndo kuꞌva ya koo vaꞌa ndo xiꞌin ndiꞌi naꞌa.

Ñani yo, xiꞌin kuꞌva yo, ndüku ndo kuꞌva ya sindiko koo ndo ya väꞌa nuu taꞌan ndo, chi mií Ndioxi ku ra chaꞌvi nuu naꞌa xaꞌa ya väꞌa íkan na xiꞌin ndo. Tá kuꞌva káꞌan tuꞌun mií ra, ya káchi saa: “Yeꞌe ku i kúu mií ichí ya xaa nduvaꞌa i xiꞌin naꞌa, chaꞌvi i na tá kuꞌva íkan na”, káchi Iva yo Ndioxi.

Ñani yo xiꞌin kuꞌva yo, küxuxan ndo xaa chiñu ndo, ndinuꞌu ni ini ndo ikan ndo chiñu ya xíniñuꞌu ndo ikan ndo nuu Tata yo Jesús.

Xaꞌa ya vaꞌa ni Ndioxi ta si̱niꞌi uun ra nuu i káꞌan i xiꞌin ndo, yakan xíkan ni i ya mani nuu ndo ndïkani ini ndo ya vaꞌa ni ka mií ndo nuu inka naꞌa. Vaꞌa ka kiꞌin ni ndo kuenta ndá kuꞌva ndíkani ini ndo xaꞌa mií ndo. Ta ndáꞌvi, ndáꞌvi ndikani ini ndo, ikan ndo tá kuꞌva íyo ya vaꞌa ta̱xi Ndioxi ndaꞌa iin iin ndo ya kándixa ndo ra.

Tá väꞌa íkan naꞌa xiꞌin ndo, ta ïkan ndo tá íkan na. Kundiꞌi ni ka ini ndo ikan ndo ya vaꞌa nuu ndiꞌi naꞌa.

Ta vívií koo ndo xiꞌin taꞌan ndo, käni taꞌan ndo. Kütai ni ini ndo nuu naꞌa, vívií koo ndo xiꞌin na, ta saa ikan ndo xiꞌin ndiꞌi na, ni na ndáꞌvi ku na, ta koto vií ndo na. Ta ndäsa xíni ni ka ndo mií ndo nuu inka naꞌa.

Ta saa káꞌan tuku Ndioxi, káchi ra: “Tá tu kúni kuxi naꞌa, na sáa ini xíni ndóꞌo̱, ta vaꞌa taxi ndo kuxi na. Tá tu íchi na tikuii, ta vaꞌa taxi ndo tikuii koꞌo na”. Chi tá íkan ndo saa xiꞌin na, ta tá íin ñu̱ꞌu̱ yěꞌé saa íin ya síkoyo ndo xiní na, án táxi ndo kúkaꞌan nuu na.

Ta kaꞌan ndo xiꞌin Ndioxi xaꞌa naꞌa, na xáa nduvaꞌa xiꞌin ndo. Nduku ndo ya vaꞌa nuu Ndioxi xaꞌa na, ta ndüku ndo chiꞌña sata na. Kusini ni ndo xiꞌin naꞌa, na kúsini, ta kuaku ndo xiꞌin naꞌa, na xáku.

Saa koo ndúvi ndo ya chindee ndo na ndaꞌvi veꞌe ñuꞌu, na ñuu Ndioxi. Ta ndikuiso vaꞌa ndo naꞌa, na xáa veꞌe ndo, án ñuu yati vaxi na, án ñuu xika vaxi na, ta ndikuiso ndo na. Saa taxi ndo kuxi na, ta taxi ndo nuu kusun na.

Ta xa xíni mií ndo, ndá kuꞌva íyo ikin kuñu yo, kuaꞌa ni ñaꞌñu kúu mií ya, sundi xa síin, xa síin chiñu íkan iin iin ya. Ta saa íyo ndiꞌi yo kándixa Jesucristo, ni kuaꞌa ni nuu ku yo, ni xa síin, xa síin chiñu íkan iin iin yo, sundi tá íyo ikin kuñu ra saa ndúu yo xiꞌin ra. Iin nuu ndúu ndiꞌi yo xiꞌin ra, xaꞌa ya ikán kua iin ndúu yo xiꞌin na taꞌan yo xaꞌa ra.