Popular Bible Verses from Deuteronomium 28

Share

“Efu un arki bun san MASRA, un Gado, e taigi unu èn efu un hori unsrefi trutru na ala den gebod di mi e leri unu tide, dan MASRA, un Gado, o gi un moro makti moro ala tra folku na grontapu.

Efu un arki san MASRA, un Gado, e taigi unu, un o si den blesi disi na ini un libi

Efu un hori unsrefi trutru na den gebod fu MASRA, un Gado, di mi e leri un tide, dan MASRA sa meki un de na fesi, no na baka. Un sa go nomo nanga fesi, no nanga baka.

MASRA sa opo heimel, a bigi kamra fu En pe den gudu fu En de, èn seni a alen tapu a yoisti ten kon gi a gron fu unu. A sa blesi ala sani di un e du taki un o man leni furu folku sondro taki unsrefi abi fu leni.

MASRA sa fon den feyanti fu unu di ben wan feti nanga unu, dan A o gi den abra ini un makti. Leki wán man den o kon na un tapu, ma den o panya ala sei te den e lon gwe gi unu.

A blesi fu Gado sa de na tapu den maksin fu unu, nanga ala sani di unu e du. A sa blesi unu ini a kondre di MASRA, un Gado, o gi unu.

A blesi fu Gado sa de na un tapu te un e go nanga te un e kon.

A blesi fu Gado sa de na un tapu ini a foto nanga te un de ini un gron.

A blesi fu Gado sa de tapu den pikin fu unu, tapu den sani di un prani nanga den pikin fu den meti fu unu: de pikin fu den kaw, nanga den pikin fu den skapu nanga den krabita fu unu.

MASRA sa teki un leki En santa folku, leki fa A ben pramisi un taki A bo du, efu un hori unsrefi na den gebod fu MASRA, un Gado, èn efu un libi leki fa En wani.

A blesi fu Gado sa de tapu a nyanyan ini un baskita nanga a brede fu unu.

MASRA sa gi un ala sani bogobogo. A sa gi un furu pikin. A sa gi den meti fu unu furu pikin èn a gron fu unu o gi furu nyanyan, ini a kondre di MASRA sweri na den afo fu unu, taki o gi en na unu.

Dan ala folku sa si taki MASRA teki un leki en folku èn den sa lespeki unu.

Ma un mus hori unsrefi na ala den gebod di mi gi un tide. No wan fasi un mus du wan tra sani leki san den e taki. No waka baka tra gado èn no dini den.

Efu un no arki san MASRA, un Gado, e taigi unu, èn efu un no hori unsrefi na ala den gebod nanga den sani di un mus tan du, dan den fluku disi sa de na un tapu.