Popular Bible Verses from Bhaloma 12

Share

Nkotokuganikia handa bhandu bha heche chilambo chibhaganikianga, ila Annoongo agatendebhue genigala gang'anikianga. Ngapena pampakugumanyanga upaliho gwa Annoongo na kuchimanya chikubho hecho chichibhii chammbone, chichaabhajila na chichitekukamilika.

Bahi, akaalongo bhangu, kwa kubhee Annoongo nga abhii na kiha hijingi, ndendakunnyopanga kwa ntima gwangu goha. Muchibhoange akaachinabhene kwa Annoongo mmangange handa mbeeko jijibhii jimomi, jijibhii ja Annoongo na jakwabhajila Anoongo. Jenje nga ndela jinunji ja kweli ja kwaachalila Annoongo.

Kulupalila kwinunji kummekange mu kuhachuka machobha goa, mmangange bha kuimbililanga mu hibhini, na machobha goha ntamange mu kwaajopa Annoongo.

Nkotokoonda ubohu gukupete, ila mwenga mugupete ubohu kwa kupangana gagabhii gammbone.

Mpalanange mwangota kwa mwangota handa akaajinunji bhabhalinge mu kuhobhalela, mwatopeange na kwalongoleanga bhangi.

Mpalanange panga undendemundu goha gola. Nkanange hikubho yoayela hibohu, kila jumo ammone nnyakwe jwammbone muno.

Ntendange kila chinkombolanga ili nkombolange kutama kwa kuhengwa na bhandu bhoa.

Henela bhandu bhangu bhanampalanga, nkotokuchibhujikia mabohu nambo mwaalekelele Annoongo chikubho hecho, kwa kubhee Majandiko ga Annoongo, Hangwana alobhola, “Kwa ngani ja kuchibhujikia nga lihengo lyangu, nenga mbakummujikia.”

Nkotokubhee akaakata, ila ntendange lihengo kwa ntima gwoa kongo mmi kwaatumikila Hangwana Annoongo.

Ligongo lya umbone gwa Annoongo gubhatekumbekea ndendakunnobholelanga mwangota bhoha, nkotokuchibhona kubhee nga chilebhe chammbone kupunda chinpalikwa kubhee. Nchipemange mwakaachinabhene henela chimmilinge mu kuhobhalela yakubhee Annoongo akampekea kila jumo jwitu.

Handa mundu atekunnemwa, nkotochibhujikia ubohu. Ntendange genigala gagamanyikana na bhandu kubhee gammbone.

Ntamange kwa kuhengwa mwangota kwa mangota. Nkotokuchipunanga, nambo mmangange tayali kubhee aganja na bhandu bha kubhelulilwa na bhangi. Nkotokuchitendanga kubhee nkweti luunda kupunda bhangi bhoa.

Hela hela, Majandiko galobhola, “Apwati bhinu handa abhii na njala, mwapekee chakulya, handa abhii na nyota mwapekee machi ang'wee. Kwa kubhee handa mpakutenda henela mpakwaatenda abhee na honi ngolongwa.”

Mwaatendelange gammbone bhoa bhabhatendakunnagianga, mwaatendelange gammbone wala nkotokwatendebhukia libhele. Nhachukange pamo na bhoa bhabhatenda kuhachukanga, na ng'utange pamo na bhoa bhabhagutanga.

Mwajangatilange akaajinunji bhabhahobhalela Akilisito handa mwangota mu hilebhe yabhenji, mwaamandikiange akaageni kwa upaliho.

Handa henela mu mmele gumo gubhii na hiyega hijingi, na kila chiyega chimo chibhii na lihengo lyabhe. Helahela na twenga tutubhii twaajingi tubhi mu mmele gumo kwa kulondanika na Akilisito, na kila jumo nga chiyega cha ajabhe.