Popular Bible Verses from Migani 2

Nyamuzinda ye hâna oburhimanya, Omu kanwa kâge mwo murhenga obumanye n’obumva.

Mwâna wâni, erhi wankayankirira ebinwa byâni, okanabîkirira amarhegeko gâni oku murhima gwâwe, Okanarhega oburhimanya okurhwiri, onayêrekezagye omurhima ebwa makengu. Nêci, erhi wankadôsa emirhima, erhi wankalakira obukengêre, Erhi wankabulongereza kula balongereza ensaranga erhi wankabusikimba kula bahûmba obuhirhi, Ago mango wanayumva okurhînya Nyakasane kwo kuderha kurhi, wanabandâna okurhînya Nyakasane.

Abashinganyanya bo abîkîre obucire bwâge, yêne ye mpenzi ya balya basêza obudahemuka, Yêne ye mulanzi w’enjira z’obushinganyanya, ye mulanzi w’enjira z’abemêzi bâge.

Bulyâla abantu bashinganyanya bo bâyishirya ecihugo, entagengwa zo zâyishicibêramwo; Ci abaminya bôhe kukûlwa bayishikûlwa omu cihugo. Endyâlya kukagwa zâyishicikagwâmwo.

Obwîrhonzi bwâkulanga oku mukazi w’embuga, oku mukazi mugenzi n’oku binwa byâge by’olubohôlolo; Olya walesire owâbo bàkulaga bo naye, àyibagire eciragâne ca Nyamuzinda wâge.