Popular Bible Verses from Ẹksọdọs 7

Share

E Nọyaẹnmwa keghi kha wẹẹ, “Ghe, I khian ya uwẹ ru vbene Osanobua ye ne ọba. Ọtuẹn ighẹ Errọn ghi gha guan nuẹn zẹ vbe akhasẹ ruẹ.

Sokpan, I gha ru ẹe ne ọba ze vbe udu, uhin vbe I gha ye winna iwinna ọyunnuan kevbe ọghe ama nibun nẹ vbe Igipt. Ọba Igipt i ra rhie ehọ ne uwa ta yi, ẹghẹ nii 1 gha fi otọ nii emwi, I ghi rri ivbi Igipt oya ẹsẹse, mẹ ghi viọ ivbiyokuo mwẹ, ivbi Izrẹl ne emwa mwẹ ladian hin otọe Igipt rre.

Ivbi Igipt gha rẹn wẹ mẹ ọrọre Nọyaẹnmwa vbe ẹghẹ ne I gha na kpa obọ mwẹ fi iran emwi, I ghi vbe viọ ivbi Izrẹl hin otọ iran rre.”

Ẹre ọba na tie avbe umẹwaẹn kevbe ọbo edunna rẹn hia, iran keghi vbe ya ọbo edunna iran ru vberriọ. Iran keghi filo ọkpọ ne iran ya tua otọ ku otọ, ehia keghi khian ẹyẹn, sokpan ọkpọ ọghe Errọn keghi rhọ ọghe iran re.

Enian ọre Nọyaẹnmwa khare nian, ‘Emwi ne I ra ru na gha rhie ma ruẹn wẹ mẹ ọrọre Nọyaẹnmwa. Ghe ẹre, I ra ya ọkpọ na fi ẹzẹ emwi, ọ ghi khian esagiẹn.

“A deghẹ ọba wẹ ne uwa ya iwinna ọyunnuan rhie ma ighẹ wa nọ, u ghi tama Errọn wẹ ne ọ rhie ọkpọ ne u ya tua otọ ne u fi ẹe fi otọ vbe odaro ọba ne u ya ẹe khian ẹyẹn.” E Mosis kevbe Errọn keghi bu ọba, iran na ru vbene e Nọyaẹnmwa tama iran. Errọn keghi fi ọkpọ ne ọ ya tua otọ fi otọ vbe odaro ọba kevbe emwa iwinna rẹn, ọ keghi fiwerriẹ khian ẹyẹn.