Popular Bible Verses from Ẹksọdọs 10

Share

E Nọyaẹnmwa keghi tama e Mosis wẹẹ, “Bu ọba gha khian. I gie irẹn kevbe ekhaẹmwẹ ọnrẹn yin ehọ nẹ ne I miẹn ehe na winna avbe iwinna ọyunnuan ma iran. Ne uwa vbe miẹn ya kpa itan ma avbe ivbi uwa kevbe eyẹ uwa vbe ne I do ivbi Igipt ọzuọ hẹ vbe I winna iwinna ọyunnuan mwẹ ma iran. Wa hia fẹẹrẹ gha vbe rẹn wẹ mẹ ọrọre Nọyaẹnmwa.”

E Nọyaẹnmwa keghi tama e Mosis wẹẹ, “Niẹn obọ ruẹ da odukhunmwu ne ebiebi ne ọ so sẹrriọ wẹ ọ ke ghi mwẹ imi so yan otọ Igipt.” E Mosis keghi tọn obọ ẹre mu ghe odukhunmwu, ebiebi ne ọ mwẹ imi keghi so gba otọ Igipt hia la ẹdẹ eha. Ivbi Igipt i ghi sẹtin dẹghe egbe. Ne ọ vbe kpao vbe owa ẹre rre vbe ikpẹdẹ eha ẹi rrọ, sokpan uwanmwẹ ke gha rre ehe ne ivbi Izrẹl ye hia.

Ẹre Mosis na niẹn ọkpọ ẹre, e Nọyaẹnmwa na gie ẹhoho hoho la otọe nii hia la ẹghẹ avan kevbe ẹghẹ asọn hia ke odẹ ọlarre ovẹn gha dee. Ẹdẹ ghi gbe, ọ viọ avbe irhiso nii hia rre nẹ. Iran ke wa vẹ gba otọe nii hia, iran na gha rre ẹvbo nii hia. Ọna ke gha re oghẹn irhiso ne ọ bun sẹẹ ne a he miẹn ra ne a ghẹ ghi miẹn.