Popular Bible Verses from Хэбзэ тхыжьыгъэр 8

Share

Ау шъуи Зиусхьанэу Тхьэр шъугу ижъугъэлъ. Арба мылъкур шъо шъозыгъэгъотырэр. Джаущтэу джы къызнэсыгъэми шъуятэжъхэм къадишӀыгъэ зэзэгъыныгъэр Ащ къеушыхьатыжьы.

Ащ шъуригъэуцуалӀэщтыгъ, гъаблэм шъухигъэтыгъ, шъори шъуятэжъхэми зыфэдэр шъумышӀэрэ мон шхынымкӀэ зышъуигъэшхэкӀыгъ. ЦӀыфыр хьалыгъум имызакъоу, ау сыдрэ гущыӀэу Тхьэм ыдэжь къикӀырэми зэрэрыпсэурэр джаущтэу шъуигъашӀэ шӀоигъуагъ.

Шъуи Зиусхьанэу Тхьэм шъугу илъыр, Ежь иунашъохэр жъугъэцэкӀэщтхэмэ е шъумыгъэцэкӀэщтхэмэ зэригъэшӀэнэу шъуригъэуцуалӀэзэ, шъуиушэтызэ, илъэс тӀокӀитӀум зэпымыоу шъоф нэкӀым шъукъызэрэщырищэкӀыгъэр шъугу ижъугъэлъ.

Шъуилъэпкъ псэукӀэшӀу иӀэу зыхъукӀэ, а байныгъэр зэкӀэ шъо шъукӀуачӀэкӀэ къэшъулэжьыгъэу шъугукӀэ зэшъуӀожьынкӀи мэхъу.

Шъусакъ, шъуи Зиусхьанэу Тхьэр шъугу ижъугъэлъ, Ащ иунашъохэу, ихэбзэ гъэунэфыгъэхэу, ишапхъэхэу непэ шъозгъашӀэхэрэр жъугъэцакӀэ.

ЦӀыфыр ыкъо зэреушъыинэу, шъуи Зиусхьанэу Тхьэр къызэрэшъоушъыирэр шъугу ишъуубыт.

Шъушхэу зызыжъугъэшхэкӀыкӀэ, шъуи Зиусхьанэу Тхьэм къышъуитыгъэ чӀыгушӀум пае щытхъу фэшъушӀ.

Шъуи Зиусхьанэу Тхьэм иунашъохэр жъугъэцакӀэх, Ащ игъогухэм шъуарыкӀу, щынагъо фышъуиӀэу Ар жъугъэлъапӀэ.

Ащ шъуригъэуцолӀэным, шъиушэтыным, ыужыкӀэ зэкӀэ шъуиӀофхэр дэгъунхэм пае, шъори шъуятэжъхэми зыфэдэр шъумышӀэрэ мон шхынымкӀэ шъоф нэкӀым шъущигъэшхагъ.

Армырмэ шъушхагъэу зызыжъугъэшхэкӀыкӀэ, унэ дэгъухэр шъушӀыгъэхэу ахэм шъузачӀэхьажькӀэ, шъуибылым, мэл-пчэн Ӏэхъогъухэм къызахахъокӀэ, тыжьыни дышъи, сыдрэ мылъкуи бэу шъуиӀэхэ зыхъукӀэ, пагэ шъухъунышъ, Мысырым, пщылӀэу шъуздэщыӀэгъэ чӀыгум, шъукъизыщыжьыгъэ шъуи Зиусхьанэу Тхьэр шъущыгъупшэжьыщт.

Шъуи Зиусхьанэу Тхьэм шъуещэ чӀыгушӀоу псыбэ зыдэт псыхъохэр, хыкъумэхэр, псынэкӀэчъхэр зыщыхъой кӀэйхэмрэ къушъхьэхэмрэ зыдэщыӀэхэм; коцымрэ хьэмрэ, сэнашъхьэмрэ шхынцумпэмрэ, нар чъыгхэр къызыщыкӀыхэу, зэйтын дагъэр, шъоур зыдэщыӀэхэ чӀыгум, лэжьыгъэкӀэ щыкӀагъэ, фэныкъуагъэ гори зыщышъуимыӀэщт чӀыгум, гъучӀыр зычӀэлъэу, гъуаплъэр къызщычӀэпхын плъэкӀыщт къушъхьэхэр зыдэщыӀэ чӀыгум шъурищэщт.

Ащ ыуж Мосэ къыӀуагъ: «ШъущыӀэным, нахь шъубэгъоным, шъуятэжъхэм къаритынэу Зиусхьаным гущыӀэ пытэ зыфишӀыгъэ чӀыгум шъуихьанышъ, ар шъуиунае хъуным пае, непэ къышъосӀощт унашъохэр зэкӀэ шъуегугъузэ жъугъэцэкӀэн фае.

Шъуищыгъынхэр лажьэщтыгъэхэп, шъулъакъохэри а илъэс тӀокӀитӀум пщыгъэхэп.

Щэнаут зыхэлъ блэхэмрэ скорпионхэмрэ зэрызыбзэ шъоф нэкӀышхоу щынагъом, чӀыгу гъугъэу псы зэрымытым Ащ шъукъыщырищэкӀыгъ. ШтаукӀ къушъхьэ цакӀэм къыпхыригъэчъи, псы Ащ къышъуитыгъ.