Popular Bible Verses from Remarya 12

Share

I menshe ap kay phoub djivenn pal pengro shero. Ma djivenn yaake har yon! Moukenn t'men o Deblestar neves te krell, te hayvenn t'mer, hoy yob kamella: kova, hoy hi lačo oun mishto oun čačo.

Mire phrala, o Devel hi kamlo ap t'mende. Doleske mangau t'men o tselo djiyestar: Djivenn t'maro djipen o Debleske, oun venn leske kokres koy, yaake te vell o Devel barhtelo pral t'mende. Te djivenn t'mer yaake, sharenn t'mer les. Oun kova hi t'mari boudi.

Avenn barhtele oun dikenn ap o lačepen, hoy ap t'mende vella an ko tsiro, hoy vella! Te vell t'maro djipen pharo, rikrenn vin! Mangenn o Debles hako tsiro!

Ma mouk o čilačepen o ray pral toute te vell! Mouk o lačepen zorleder te vell har o čilačepen!

Kamenn i phralen oun i phenyen o tselo djiyestar! Hakeno hounte rikrell o vavares bareder har pes kokres.

An t'maro kamlepen hounte vell kek rhorhepen! Moukenn o čilačepen oun krenn o lačepen!

Yaake boud har djala oun ap t'mende hi, djivenn lauterentsa kamles khetne!

Mire kamle phrala oun phenya, ninna te kras yek t'menge čilačo koova, ma denn leske pale! Moukenn les! O Devel dell les i phagi. An o Debleskro lab hi činlo: O Devel penas: Me dau len pale. Me dau len i phagi.

Ma avenn khino! Krenn t'mari boudi i tseli zoryah! Halauter, hoy t'mer krenna, krenn o Yezouseske, maro rayeske!

O Devel his lačo ap mande, oun das man miri boudi, te penap leskro lab. Doleske penau hakeneske t'mendar: Kek te hadell pes pral o vavareste oun rikrell pes bareder oun feteder! Hakeno las peskro patsepen o Deblestar. Doleske hounte vell lo gosevo, te dikell lo oun te hayvell lo, hoy les o Deblestar dino vas.

Te hi yek čilačo ap t'mende, palle venn gar čilačo ap leste! Krenn, hoy lačo hi an i tsele menshengre yaka!

Avenn t'men yek dji oun yek djipen! Ma krenn t'men bares! Avenn i mala kolendar, ap kolende i vavar tele dikenna! Ma penenn, te han kokres gosevo!

Krenn kova yaake har an o Debleskro lab činlo hi: Te bokell kova, kay kras čilačepen ap toute, palle de les te rhal! Te hi les troush, de les te piyell! Tou te kreh kova yaake, palle ladjell lo pes toutar.

Rakrenn lače laba ap kolende, kay lenn t'men palla! Mangenn o Debles lenge, oun koshenn len gar! Avenn barhteles kolentsa, kay barhtelo hi! Rovenn kolentsa, kay rovenna!

Denn kol čorvele patslende, hoy len hounte vell djipaske! Kolla, kay pash t'mende venna, kolen lenn an t'mare khera dren, oun denn len te rhal oun te piyell!

I menshes hi yaka, vasta, pire. Oun hako kotar krell gar i emligi boudi. Yaake ham mer boud patsle oun djah khetne ap o Yezouseskro drom, oun yaake hi yek o vavareske koy.