Popular Bible Verses from 1. Petro 3

Share

O Yezous Kristo kokres te vell o ray an t'mare djia! Oun te poučenn le t'mendar čomone pral t'maro patsepen, ma darenn kek tsiro, te penenn lenge, ap koneste t'mer patsenna. Rakrenn lentsa lačepah, oun krenn t'men gar bares pral lende! Rakrenn dran i djoudjo dji, te vell i ladj ap kolende, kay rakrenn djoungeles pral t'maro djipen o Yezous Kristeha!

O Devel, maro ray, dikell lačes ap koleste, kay djivell pal o čačepen. Oun te mangell yob o Debles, shounell lo les. Ap kolende, kay djivenn an o čilačepen, dikell o Devel gar lačes.

T'maro shoukapen hounte vell gar diklo an kova, hoy i menshe dikenna: har t'mer t'mare balla hidjrenna, vitar gar an o sonakay oun kouč ripya! T'maro shoukapen hounte vell dran t'maro dji oun sikrell pes an o lačepen, kay kek čingepen dren hi. Savo shoukapen ačella, oun hi boud moldo glan o Debleskre yaka.

An o Debleskro lab hi činlo: Koon kamell i lačo djipen oun barhtele divessa te dikell, kova dell garda ap peskri čip. Kek rhorhepen, kek čilačepen hounte vell dran leskro mouy! Yob moukell o čilačo koova, oun krell o lačo koova. Peskri tseli zoryah krell lo, te djal kek čingepen mashkral i menshende!

Ap t'mende lauterende penau: Rikrenn khetne! Hakenes te vell i dji o vavareske! T'mer lauter han phrala oun phenya. Avenn lačes yek ap o vavareste! Ma krenn t'men bares! Krenn kekeske čilačepen, kay kras ap t'mende čilačepen! Yek te čingrell ap t'mende, ma čingrenn pale! Rakrenn lače laba leha! O Devel das t'men gole, te lenn t'mer leskro lačepen.

T'mer te kamenn i tseli zoryah lačo koova te krell, koon krell t'menge čilačepen? Kek, patsau.

Yob moukell o čilačo koova, oun krell o lačo koova. Peskri tseli zoryah krell lo, te djal kek čingepen mashkral i menshende!

Te krenn t'mer lačo koova, oun dran kova krenn le t'mentsa čilačo koova, palle hi kova feteder, har te krans t'mer čilačo koova. Yon nay doukrenn t'men gar, te moukals len o Devel gar.