Popular Bible Verses from 1 PITER 2

Share

Sikhalsehla nannih cu hrilcia miphun, Siangpahrang ih puithiam, miphun thianghlim, Pathian ih miphun bulce nan si. Khawthim sung ihsin mangbangza tleunak sungih a lo kotu Pathian in khawruahhar thil a tuahmi pawl tlang-aupi dingih hrilmi nan si.

Khrih in amah ih taksa rori in kan sualnak cu thinglamtah ah a thlenpi zo ruangah kannih cu sualnak ahcun mi thi kan si ih dingnak sungah a nung dingmi kan si. Amah ih hmaa ruangah damnak nan ngah zo. Zin a hlomi tuu bangtuk in nan rak hlota; sikhalsehla atu-ah cun nan thlarau Khaltu le Kilkhawitu thlun dingah nan zin hlohnak ihsin kirter salmi nan si zo.

Tuih hlanah cun Pathian ih minung nan si lo, sikhalsehla atu-ah cun amah ih ta nan si; tuih hlanah cun Pathian ih zaangfahnak nan thei lo; sikhalsehla atu-ah cun a zaangfahnak nan co zo.

Naute suak pek bangtuk si uh; thlarau hnawiti duh uhla cuih hnawiti nan innak thawngin nan ṭhang ding ih rundam nan si ding.

Ka duhdawtmi ka rualle tla, hi leilung tlunah mikhual le raltlaanmi bangtuk nan si ih nan hnenah zaangfah ka lo dil a si. Thlarau thawn a ral aw ringringmi taksa hiarnak in lo neh hram hlah seh. Pathian zum lomi lakah ziaza zohṭhim tlak in nung uhla ṭhat lonak a tuahtu tiin sual lo puh hman hai sehla, nan nuncan ṭhatnak an hmu ding ih Pathian a rat Ni ah amah cu an thangṭhat ding a si.

Nanmah khal ra uhla a nungmi lungto bangtuk in thlarau biakinn saknak hrangah Pathian ih hmanmi lungto si uh. Cutawkah puithiam thianghlim hnaṭuan nan ṭuan ding ih cohlan tlakmi thlarau raithawinak kha Jesuh Khrih sungin Pathian hnenah nan pe ding.

Curuangah ṭhat lonak hmuahhmuah cu hlon ṭheh thlang uh; thuphan per nawn hlah uh; titer aw nawn hlah uh; mi iksiik hlah uh; hmuhsuamnak ṭong hmang nawn hlah uh.

Bawipa ih hnenah ra uh; amah cu minung in santlai lo tiin hnong hman hai sehla Pathian in a sunglawi tiih a hrilmi a nungmi Lungto a si.

A luatmi bangtuk in nung uh; sikhalsehla nan luatnak cu ṭhat lonak huptu-ah tuah hlah uh; cuhnakin Pathian ih sal bangin nung sawn uh.

Ziangahtile ziang hman thei loih a ṭongtu mi aa pawl ih ṭongnak hi thil ṭha nan tuahmi in tukdai seh tiah Pathian ih a lo duhsakmi a si.