Popular Bible Verses from Keluaran 20

Share

“Nara anggun ni koproba Allah, na si ara, Yahweh unune. Mesir mutuku ninye arye ikin pil dobuka, sik nong deice delilamsikba, kanye imun kibuka ulamlumak, Mesir mutuku noutamak arye dobuka boyanamsisinye bira, na unune,” nyabuk. “Allah yuk ulula nyabuka, yuk-yuk ning si erena pia meme. Allah na uk ununa ati, natibuk kibuka, na siuk erenamnulume.” Allah arye nyabuk.

“Im deice ubuk ning ap, tukwak ubuk ning ap, mek amu ubuk ning ap, aning nirya ara, sik urasin atonun puturubuka kintinipmunce, ‘Aning si erenamabe’ tenena pia meme. Yuk talye ning si erena ati, yuk-yuk ning urasin atonun kilina kume,” nyabuk. “Yata ning do nirya, urasin atonun puturubuka, aning ati kisal dobuka, gutam tuku dipdongobuka si erena meme. Anggun ni Allah ara na Yahweh uka. Ati yuk talye ning si erena meme. Na mapu arye yuk ning nirya ati, ‘Nun ni’ tenen, si erebikcopura, na malye kanye bobuka pia yu unune. Nati, ‘Nun like’ tenen, malye-malye nyaninyak nang ara, sik wenepnirye, sikce deipnamak mapu ap, sik mapu deipnamak mapu ap, amapu babye deipnamak mapu ap ara, sik deipkirikdop nang ninye dika bitinye do, winilye do nirya ara, tuba wenenamne,” Allah arye nyabuk.

“Anggun ni yapu ap, anggun nin yapu ap, ‘Sikda mambule’ tenen, sik yupu moubuka kekemunya deice arye, teleb winipmunyopura, keting tamun weika arye tonap arepnamsine. Pia teleb mutuku arepsinyopura, kam tuba unamlume,” Allah el si Yahweh arye nyabuk.

“Narye anggun dikdik sen sum arepsise ning ara luba kina meme. ‘Asum ara, Allah el si Yahweh, el mambul sum’ tenen, asum noutamak talye una kum bukni, asum yuk wibuka deipmunce, na Allah ati moubuka tenepmunce, diksukumuk unamlulume,” Allah arye nyabuk.

“Anggun ni koproba Allah, na si Yahweh ati ara, na si talye-talye si nyana meme. Yatanye do, na si talye-talye si nyalamlinye biti ara, ‘Dauaplye’ kum tenenamne. Na si talye nyaplobikce nang ara, dipkoprob pia weika arye wenepnamne,” Allah arye nyabuk.

“Like nakub barye sum arepsise talak ara, anggun pil dobuka unamlume. Bukni, tekbarye sum ara, el si ara Sabat sum. Asum ara, Allah na mem sum anya arye, asum deice arye na Yahweh atibuk tenenanululume. Ati ara, yata pil do nirya, asum deice talye pil dona meme. Ara, anggun babye, anggun mapu babye, anggun kilmapu babye, anggun pil don nang ap, pil don kilapu ap babye, anggun weilulum ning keledai basam do, sapi do, aning babye, pil kum donamake. Tonda, yuk mutuku arye, anggun mutuku noutamak tikilyangan nang babye, pil arukmunye pil kum donamake. Anang sik bidamang pil ton kum donamake. Asum, Sabat sum ara, talye pil aning-aning nirya ara pil dona meme,” Allah arye nyabuk.

“Yuk nang sik ning nirya ati, ‘Se, na uk doproptinye,’ tenena meme. Ara sik aik ap, sik kilapu ap, sik pil melina nang ap, pil melina kilapu ap, el sapi basam ap, el keledai basam ap, el weilul ning yuk ning ap, tonda, yata ning do, el talilye ning nirya ati, ‘Na doproptinye,’ tenena meme,” Allah arye nyabuk.

‘Yuk nang arye, anye malye winibuke, tenepnamak’ tenen, anggun kwit capu ati, tilila yupu nyana meme. Allah arye nyabuk.

“Sal do, kilapu do akunum dopramunyopura, yuk kilapu do, yuk nang do, ubula yolana meme. Aning atonun yata ninye do nirya, talye-talye yolana pia meme,” Allah arye nyabuk.

“Anggun kanye aniryuk yu kibuka ninye talye ona meme,” Allah arye nyabuk.

“Ubula dona meme,” Allah arye nyabuk.