Popular Bible Verses from Keluaran 10

Share

Allah el si Yahweh arye, Musa biti nyabuk. “Ance, Firaun un dam bilyame. Narye, el nong kwepdeiamsa ati, wini talak narye arepsiba, el ap, el pil dona deiyok nang ap, sik talima malya kibuka bisinyak ning ara, narya. Deiyok ara, Mesir ninye ara, ‘Se Allah arye dipkoprob pil dopsile, tenebikirye kel kipnamak’ tenen, sik noutamak ninye kum winipmanto ning pil dopneba, kel kipnamake. ‘Utenepnamak’ tenen, talima kat una deiyok ning Firaun biti arepse. Tonda, ‘Anggun Israel ninye eibuka kel kipmunce, anggun mapu ap, aminyan talak anggun mapu arye, deipra banamak mapu ap ati, na wininpse ning laka nyanamlum’ tenen, winipse. Anggunce anggun mapu nirya ati, na wininpse ning laka nyanamlume. Ara, Mesir mutuku ninye malye ubikba, na mikip arye, kanye imun ning weik, sik nong deice delilamsirye, ninye kum winipmanto ning, Mesir mutuku noutamak arye pil dolamse. Aning nirya laka nyapmunyeba, anggun mapu kekebikirye, na wininye ning kel kipnamake. Tonda, anggun nirya arye, ‘Se, Allah ara Weik Deiyoknye el tonok ulule’ tenen, kel biknamlume,” Allah arye, Musa biti nyabuk.

Allah el si ara, Yahweh arye Musa biti nyabuk. “An taruk im deice pukminba, Mesir mutuku noutamak nirya inipnule,” nyabuk. “Winibuka pia inipnamla anya arye, dirina ara, mitik tonun babye kum upliba, ninye arye kum eipdanmanto ubikirye, ilil weik upnuyake,” Allah arye Musa biti nyabuk. Nyabukura, Musa birye el taruk im deice erebuka kama pukukba, Allah arye inina arebukba, amutuku nirya inibuk. Winibukba, Mesir mutuku noutamak, like winilye sum deice arye, pia inibuk. Inibukba, ninye arye kum eipdanmanto ubikce, el kwit birye, el kwit biti kum eipdanmanto ubika ati, ninye nirya kum binmanto ubikba, sik mining aik pumuk unmek. Ara, like winilye sum arye inibuk. Winibuk bukni, Israel ninye sik ulamikak ara, dirin deice pia teleb touk ulamik.

Nyabukura, Musa el kama Mesir mutuku tuku deice pukminyeura, Allah el mikip arye weik kumanya yali tam arye dobuka yayukce, asum keting noutam talak babye, lukunyan talak babye, kumanya weik arye donmoka ani, berekukopura, yali tam arye, sul kwising tonap tabakuka boyayuk. Winibukopura, sul kwising weike yayikce, Mesir mutuku nirya langdibuk. Langdibukce, Mesir mutuku noutamak pia weika arye amubik. Ara, min talak arye dipdongobuka, wini talak noutamak nirya ap, aminyan yanamle talak babye, aning kibuk touk, sul kwising pia weik kum ulamuk, ton kum unamle. Sul kwising atalakuk, Mesir mutuku noutamak pia weika arye ubuk.