Popular Bible Verses from Dodadi 6

Share

Ho Ma Jou o Yawe duru ai hininga ihuha hiadono wato, “Naa Ngohi duru ko tosanangiua onangika hiadono ahi hininga ihuha ma titi o nyawa naa tahidadiye de tahigogere o duniaka.

De Ma Jou o Yawe wamake o nyawa mata-mataika manga wowango ma datoro itorou. De wamakeoli abe ka ihikaika ipuda manga hiningaka ka ma dorou dika.

Masara naga womatengo ai romanga o Nuhi abe wihisanangi Ma Jou o Yaweika.

Hokonaa o Nuhi ai ade-ade. Una gea ai hininga irahai, abe ma oraha gea nako o nyawa mata-mataika yomakokutuono de o Nuhi ka unangohi ai wowango ma datoro itiai hiadono ko moiua ka idadi iwitae iwihitaana. De o Nuhi gea ka ihikaika yomaketedodiawo una de Ma Jou.

Ho naa Ngohi taputuhoka abe koaho tahibinaahaka o dunia ma nyawa mata-mataika, de ko o nyawaua dika abe tatulaadauku masara ka ma moi de o aewani mata-mataika ngaro o dofo de o fuhuku de abe imalia-liara o dunia ma lokuoka. De o totaleo abe ihoo-hoho daku ma hoanino enangoo tohikokibinaaha. Hokogea todiai angamoi duru ahi hininga ihuha abe ma titi tatulaadaukuoka mata-mata gea.” Hokogea Ma Jou womatemo.

Ka de uku de o nyawa yomulaenge yowoe yodogo-dogo de mata-mataika naga yomamake manga ngofa-ngofaka o nauru de o ngofeka. De naga o nau-nauru abe yahiromanga Ma Jou ai ngofa-ngofaka, de ona yamake o nyawa utu manga ngofa-ngofaka o ngo-ngofeka abe duru yorahai de duru manga hafini itagi o ngo-ngofekaika gea. Ho manga fekata yomangiriki ko ma titiua manga wowangoino masara manga hailoaino dika hiadono yomangiriki manga fekata. De Ma Jou o Yawe wotemo wato, “O dunia ma nyawa naa yoluku dika manga hininga yaturuuru ho naa ko tadadiokaua ka ihikaika de ahi Womaha tokarajaanga onangoka. De mangale o nyawa yowango o duniaka naa kiani yohonenge ho Ngohi naa tahidoaka manga wowango ma gahe ma dekana o taongo o ratuhu moi de monaoko ona gea ka yowangohi.” Hokogea Ma Jou ai putuhu ma demo. De ona abe yahiromanga Ma Jou ai ngofa-ngofaka ahao yomakitigi de manga fekata abe yomangirikoka onagonaino dika iti yorahai, de to onangoo manga ngofa-ngofaka yomamake. De ma oraha to ona manga ngofaka gea yobalu-baluhiyeoka de duru ko yohawa-hawanua hiadono o nyawa utu yahiade-ade yahikurutiye ma titi duru yonauru ho duru yotomoroini. De ona gea yahiromangoli o Nefilimi ma nyawa. De ngaro o nguihi ipahaka ma naga o nyawa utuoli abe ahao onangoo yahiromanga o Nefilimi ma nyawa.

De o Nuhi wihingounu Ma Jou abe wodiai mata-mata wataana abe Ma Jou wihibehehongoka unangika.

Ho Ma Jou wihingahu o Nuhika wato, “Ngohi tomaputuhoka o nyawa abe naga o duniaka kiani tahibinaaha angamoi o nyawa manga sade dika ihidagi. Hokogea manga wowango ma datoro ka hiadono o dunia ma amokika aomanga de manga dorou. Ho Ngohi tato ngaro o nyawa de ngaro o aewani ma, kiani mata-mataika tahibinaaha ka ma moi de o nguihi.

Ho ngona Nuhi toniduhunu hokonaa: kiani ngona ani kapa nomadiai o gofiri ma gotaino de hokonaa ma duduga. O kapa ma gurutu kiani o tarantu hiwo, de ma ngoata kiani o tarantu moi de o mongoo motoa, de ma gurutiye kiani o mongoo hiwoiye. De ma badanga nodiai ibooto de ahao to ena ma tau nodiai de nadaduhu ma poretino. Masara ufa ma dadaduhu nohitikiye hiadono daku ma katuiye. Kiani o tau ma dadaduhu de ma katu ma hidogoronaka naga ma hoana. De ma hoana gea ma ngoatiye natuga la o dodongohono moiiye abe ma dadaduhoka hiadono ma katuiye. De moi nodiai ma ngorana o kapa ma gumurukoka. De doka o kapa ma goronaka kiani nodiai ma dangiri ilape hangeiye de ahao ma dangiri hange gea nokokabatingi nadadaduhoka la naga ma ngi ma ngoe. De ahao ma kapa ma badanga ma goronaoko de ma poretino nohijumu de o hilo.

De gea ona Ma Jou watailako de ka manga dorou dika wamake. Angamoi o nyawa o duniaka manga datoro moi dika de gea yomahiketehikokangela.

De nohingohama o kapaika o aewani mata-mata abe ahao iboa ngonaika. Abe ahao o totaleo ma rupa imaketemomoi iboa ahohinooto ma nauru de ma beka ngaro o fara mata-mataika. De o aewani ngaro o dofo, de ngaro o fuhuku, de abe imalia-liara o dunia ma lokuoka, enangoo de ma rupa imaketemomoi iboa ahohinooto ngonaika ma nauru de ma beka ngaro o fara mata-mataika. Ho o pasanga amomoi mata-mataika gea imanoa ka ngonakahi de ngini niapaliara o kapa ma goronaka la ufa ihonenge.