Popular Bible Verses from Dodadi 17

Share

De o taongo ngimoi de hange ipahaika de o Abaraama ai ngumuru adonoka ai taongo morihiwo de hiwo. De ahao Ma Jou o Yawe womahimatokoli unangika de wihingahu wato, “Abaraama, Ngohi naa Ma Jou Tokokurutiye abe o kia dika tato todiai gea ka idadi todiai. Ngona ahi himangoka kiani nowango itiai la ko iwa moi tamake ani datoroka abe ka idadi tonitaere.

De ani romanga ko o Abaraamokaua masara ani romanga taturuuru ho naa ani romangoli o Abarahaama. Hokogea tonihiromangoli mangale tonihidadi o kapongo ma ngoe manga baba abe ngaro o nyawa yomakokitingaka o nuuhu homoi-homoioka hiadono manga demo imalolihowono, ma, yobaba ngonaika.

De gea abe Ngohi tonihibehehongokau ngonaika ahao ka ihikaika tahibehehongoli onangika abe ani totoforaukuika. Ho ngaro hokokia dika yolape-lapeuku masara hokogea ahi behehongo de duru ko itogu-togumua. Hokogea ahi hininga la Ngohi todadi to ngona ani Jou de to onangoo manga Jou ka hiado-adonika.

De wato, “Hokonaa to Ngohi ahi behehongo ngonaika. Ahao ani totoforauku onangoli homoi-homoi yodadi o nyawa yowoe-woe manga dutu. Ho ika-ika de ahao ngaro o nyawa abe yomahikabarihoka ho yogogere o tonaka ma ngoeoka masara ona ko manga ngoe yobaba ngonaika.

De Ma Jou wopaluhu o Abarahaamika wato, “Ani gogahoko todafongo masara ngoni fekata o ngo Sara ahao munangino ngona nimake ani ngofaka abe tonihibehehongoka, tato ani ngofaka ahao namake, de una gea kiani nihiromanga o Isaka. De abe tonihibehehongo ngonaika gea idadi ahi behehongo o Isakikali, de itagi to una ai totoforauku mata-mataikali abe gea o behehongo ka hiado-adonika onangoka.

Abarahaama, naa tonihingahu abe ma oraha naa ngini hoka o homoa ma nyawa dika o Kanani ma tonakoka naa. Masara o tonaka naa idadioka ahi hidoaka ngonaika de ani totoforaukuika la idadi to ona manga tonaka ka hiado-adonika. De Ngohi to ona manga Jou.” Hokogea Ma Jou ai hingahu.

Ka de gea woihene de o Abarahaama womaponuku hiadono ai pea itiki ma tonakuku de woiete de ai garago. Masara nagali abe wohidemo de ai heranga wato, “Gea mode ka idadi ahi ngumuru adonoka ahi taongo o ratuhu moi de ahi ngofaka ka tamakeohi? De mode o ngo Sara abe munangoo ami ngumuru adonoka ami taongo morihiwo, de ahao ngomi miamake to ngomi mia ngofaka munangino?”

De ahao Ma Jou wotemoli o Abarahaamika wato, “De naa tonihingahu abe ahao idadi ngoni fekatika. Ibootohi nomihiromanga o ngo Sarai, ami romanga naa taturuuruoka ho ami romangoli o ngo Sara.

Kiani ngini o nau-nauru nimahuna la gea homahiketehibehehongoka, de ma dodunguu gea nia badangoka homoi-homoiika abe nihitunguu nioigo nianiiki ahi behehongo.

Masara abe ngona de Ngohi homahiketehibehehongoka, ahi behehongo gea tangodumu o Isakika abe o taongo doka nanga himangoka de womaboa o ngo Saraino.”

De ka imahikauku to ngona ani totofora kiani manga ngofa-ngofaka o nauru yahuna abe ngaro ti ngini nia ngofaka idodutu de ti ngini nia ngofaka ko idodutua ma kiani onangoo niahuna. De ngaro o ngofaka yomaboa onangino abe yokarajaanga nginioka, abe ona gea niaijaino o homoa ma nyawaino ma, to onangoo manga ngofa-ngofaka kiani niahuna. O ngofa-ngofaka o nau-nauru gea nako adonoka manga ngumuru manga wange tufange de duru o wange gea kiani niahuna.” Hokogea Ma Jou o huhuna ma titi wihitararono o Abarahaamika. De ahao ma hitararono Ma Jou wodogo wato, “De o huhuna ma pareta naa kiani o nau-nauru mata-mataika nginioka yaniiki ngaro yomaboa nginioka eko naga abe yobaluhoka ma oraha niaijaino, ma kiani ona mata-mata niahuna la naga ti ngini o nau-nauru nia kokibadangoka nimahitunguu ahi behehongo nginika ka hiado-adonika.