Popular Bible Verses from Matyuu 7

Share

Kevu Gooti toollu noonyumwonyu punyuno subusu'nyogalo kuudoganpi tov kuvinono nekullabwonekono. Gooti toolluro ilaiyo winodowo'jure kuudo tollovai kevu yo'mgonomallo'mo a'mgono supi tov kuvinono yo'mgonomapinogaikikono. Kevu kudo'aiko tovi iwago aromipi tov Gooti tool kemiyo'mo kudo'aiko kuvinono nousaikubweyonekono.

Su tov aro tovinokwono. Yiuwi'nokai a'mwo abolo Gooti toollu subusu'nyogalo kuudoganpi ton kuvinono ma'dupudogano. Aki a'mwo pwol Gooti toolluro ilaiyo winodowo'jure kuudo tollovaino a'mgono so'ji tool kuvinono yo'mgonoma'dowodekono. Aki a'mwo pwol kudo'aiko tovi iwago aromiyo'ji tov Gooti tool a'mwo su toollo'mo kudo'aiko tov kuvinono kuusubweyonekono.

Aki Jisasol aro kuudokaikono. “A'mwo pwol moro yogalo akanyu wuu'nowo'ji kuvinono kuumjuno'ji tool a'mwo pi'mwo kuudokwe pwolbusuko imo'nonekono. Pi'mwo kuudokwe su tool gamoro ago tov sulo toollu muunyu toru mododowodekono.

Toro te kevu pasudo punyuno, Oo a'mwo abolo ton nemi su toro tomgu'aro ilaiyo yanekullugolpureyokwe ikullunodowodo su tov kevnokwe togaikul a'mwo abolo punyuno aval'nodo tomgu'aro neya jugolmovlavogaulo. Kavlo su toro tovino aiyoga Moosesolluro loowo togai'aro proofet tooravuro kuuguudo togai'aro ton me'no ajakwollajupogano.

Toro kuvi kuruv aiyo yiunokuudo mujomwekovlaiyo'moneyokwe tovi kuullo'mo noullo to'gwowi yiuno kula'nyo kuunodokwono. Aki a'mwo abolo yiuno pwekwono pwekwonodo tono aiyo yiunokuudo mujomwekovlaiyo'moneyokwe tovuro puuto tovi pla'mdupudogano. Puuto su tovi plaiyo'moneyokwe tov kavenodo'maiyo. Toro te aiyo yiunokuudo mujomwekovlaiyo'moneyokwe su tovi mallo'mo tov a'mwo abolo yiuno pwekwonodo tono yo'mgonoma'dupudokwono.”

Kevu noullo yiuno kula'nyo tovi'aro to'no neya doulogaulo. Su tov aro tovinokwono. Kaiyako i'nopiyo'moneyokwe tomuuda'ai noullo tov bwotonyokwono. Aki a'mwo abolo bwotonyago ton kaiyako i'nopiyo'moneyokwe su tomuuno puuto tovi pla'mdupudogano. Puuto su tovi plaiyo'moneyokwe tov kavenodokwono. Aki a'mwo abolo bwotonyago ton kaiyako i'nopiyo'moneyokwe su tomuu yere kuulai'mo'mdupudogano.

Toro te kevu kuunumiyago ma'no ma'nodokwe toorekul kemi kwoloraiyo tobuurai yasuwa'wino sugudo ton wiyodupudorekikono. Su toro to'busuko kubalno kemi Tellunumiyago muunyu kai'muu mwalodowodo kwol kuruv yiuwi'nokai a'mwo abolo, donyabonoo, kuudoganpi tonyu sugudo pun kuvinono wiyodowodekono. Aki kwako akavida'ai kuunumiyago toorai uuwolo'mdowodekono. Toro toolluno tov kevu kuudoganpi togaikullu muunyu toru'aro kuvinono nekullamwalonekono.

“Gooti tool kemoro pasudo tooraino nojainyubworo'jokweyo'mo tov kevu a'mwo abolo punyuro pasudo tooraino majainyubwopinono. Su tov aro tovinokwono. Kevu a'mwo abolo tonyuro pasudo tooraino jainyubworopi adomdukuurosupi tov Gooti tool ikumjunowo'ji yiuno aval'nodo tomgu'aro kemoro pasudo tooraino jainbworowo'ji nodomdukuuraikubweyonekono.

Toro kuvi kuruv a'mwo pwol moro yogalo akanyu wuu'nowo'ji muumjuno'ji su toolno'gwowi a'mwo junorukuudokwe pwolbusuko imo'nonekono. Junorukuudokwe su tool gamoro ago tov weko tovi muunyu toru mododowodekono.

Guu gumi avalo tekwojuro sumdo tovida'ai sullukwako wo'dowo'jure tovi wonodumdekugono. Toro kuvi kuruv guvnokwekujuro sumdo tovida'ai i'muujuko bwotonyo wo'dowodo toollu buro'nyo'mo mwonodumdekudeyo? Guvnokwekujuro sumdo tovida'ai i'muujuko bwotonyo su tool kuuno wo'dowo'jure toga gumi avalo tekwoji aro nuudoganbiyo, “Oo nuvu gumoro sumdo tovida'ai sullukwako kwosuko su tovi nokwo modukwopimonyudukono?” Nuudoganbiyo.

Aki Jisasol aro kuudokaikono. Kevu kuunano proofet tooraino wako neya dou'nogaulo. Su tooro sipsip nobemwojo toorobusuko baiki'mo'mdupudo kuvi kuruv kemoro anakuuto tomuuno'gwowi a'mwo abolo tonyu dovanyo'moneyokwe kuullujuluko toorobusuko imo'nodupudorogano. Su toro tooravuro pasudo ton ikulsulo to'busuko ki'nodopure tonyu agallainyubwopi tov, Akal kuunanoldeyo oo nebaloldeyo, nokwo iworovomapinogaikikono. Su tov aro to'busukokwono. A'mwo pwol wain ikulsulo tov aulolo tovida'ai mamuudonekono. Aki a'mwo pwol ikulsulo fik tov sugurato tovida'ai mamuudonekono.

Su toro tovino kuudo pun jaullulo. Iko sugudo pwol ikulsulo sugudo to'no ki'nyokwekono. Toro kuvi kuruv iko kaiya'nodo toolno'gwowi ikulsulo kaiya'nodo to'no ki'nyokwekono.

Aki iko sugudo pwol ikulsulo kaiya'nodo ton mai'nyokwekono. Aki iko kaiya'nodo pwol ikulsulo sugudo ton mai'nyokwekono.

Toro te yiuwi'nokai iko pwolno pwolnodo tooro ikulsulo sugudo mai'nupi tov a'mwo pwol iko su toorai dovomwogapiyowo'ji duko tovi nyuroudapiyonekono.