Popular Bible Verses from Matyuu 5

Share

Aki a'mwo pwol gworeko amuugutowo'ji toga nobu'duvoloso'moneyokwe puvi dolago tomuu maluudapiyonekono. Toro kuvi kuruv gworeko me'no amuugutowo'ji toga nuudapiyo'moneyokwe tovi muunyu toru luudapiyonekono. Toro aluudapiyo'ji toga bako pwopiyodowo'jure tovida'ai yiuwi'nokai a'mwo abolo ago anakuuto tomuu aulomwalpi su ton sumdo nokwo wonpinogano. Toro to'busuko kubalno kevu sugupasudo tokwe kuu'maiyo toru'no neya domjumovlavogaulo. Toro supi togaikullu a'mwo abolo pun ikwonopi toga kemi Tellunumiyago muunyu kai'muuda'ai toolluno nokwo ilomoropiyapinogano. Kevu toro supi togaikul a'mwo abolo tonyu bako to'busuko wimo'nopi nokwo luvomokavla'mwalpinogaikikono.”

Aki kevu kwako akavida'ai yiuwi'nokai a'mwo abolo tonyu bako to'busuko wimo'nodupudogaikikono. Kuudo neya jaullulo. Wagwolago puruv muumuudo toollu muunyu toru wo'dowo'jure tov yiulo ku'nono miyoupuu'na'dowodokwono. Toro to'busuko kubalno kevu bako imo'nodupudo togaikul yiulo miyoupuu'na'mwalpinono.

Aki a'mwo abolo pun kemi poowokalago me'no yal'mo'nodupudo su ton ilaiyo nokwo ipinogano. Su ton Gooti toollu yiuno'no noonpinogano.

Aki a'mwo abolo sugudo to'no mujumovlaiyo'mo winodupudo ton ilaiyo nokwo ipinogano. Su tonyu Gooti toolluro sugumaluko tollovogai nyutovoubweyonekono.

Toro kuvi kuruv nuvnokwe toonyuno'gwowi aro ikudumo'mokwono. Kevu kemi ikomago ikullumo'nodupudo tooraino kalo buuropino neya domollogaulo. Aki a'mwo kaiyako yaikullugolodupudo tonyuno kevu Gooti toollu subusu'nyogalo neya duudumovlavogaulo.

“A'mwo abolo pun kuudo yau'dupudogano. Oo Gooti toolluro nonekullo'mwojono tovino supto sumwakuuwono. Su toro kuudo saupi ton ilaiyo nokwo ipinogano. Su ton muunyu kai'muuda'ai aguto kig toolluro mido mollomwalo tovi noulomwalpinogano.

Aki a'mwo abolo pun a'mwo molo yodopure toorai kibuuloda'mdupudo su ton ilaiyo nokwo ipinogano. Su toro tonyuno Gooti tool, “Oo moro kwoloraiyogano,” donekono.

Aki a'mwo abolo kalo winodupudo ton ilaiyo nokwo ipinogano. Su toro tonyuro kalo su tov Gooti gavnokwe tool dugoga nuuwilowonekono.

Aki a'mwo abolo pun sugupasudo to'no mujumovla'mdopure tovida'ai a'mwo pworo kaiyako igolopi danyu'nyuwuulo amapi su ton ilaiyo nokwo ipinogano. Su ton muunyu kai'muuda'ai aguto kig toolluro mido mollomwalo tovi noulomwalpinogano.

Aki a'mwo abolo pun a'mwo abolo pubuuraino kalo mamwonyodupudo su ton ilaiyo nokwo ipinogano. Su to kunyu kuruv Gooti tool kalo nomamwonyonekono.

Aki kevu mi numjunodupudo togaikulluno burolyogalo ikudopi aki kaiyako yaikullugolpinorogano. Aki kemino kuunano yogalo go'no go'nodo toorogai youkuu'naikudupinorogano. Tono tono yaikullugolodupudo su togaikul ilaiyo nokwo ipinogaikikono. Kevu ilaiyo yopi aki kemoro sumwoluko kun kuruv ilaiyo to'no nokwo imwalpinogaikikono. Su tov aro tovinokwono. Kevu Gooti toolluro ago toru sulomwalpi toga kemi yiuwi'nokai mubiyo bwotonyo ton nomapinogaikikono. Kevu kuudo neya jaullulo. A'mwo kemi kaiyako yaikullugolodupudo su tooro sumdomguda'ai kemi proofet kworai kuruv kaiyako aval'nodo tomgu'aro sugollajuporogano.”

Aki a'mwo abolo kevnokwe ton bwolomoropinodapudo su ton ilaiyo nokwo ipinogano. Su ton nemi Nellunumiyago toolluro yiuwi'nokai kwako tov nomapinogano.

Jisasol toro wuujuno sumaiyokwe aki aro kuudokaikono. “Kevu yiuwi'nokai a'mwo abolo kwako akavi mwalodupudo tonyu soore to'busuko wimo'nodupudogaikikono. Toro kuvi kuruv soore tovuro wuullo tov aduuwiyopiyo'ji to'gwowi wuullo su tovi adadomgu'aro aki aiko te nokwo molludo'bino'mdukono? Awiyo, ku'nono mamolludo'binokwono. Toro te soore aduuwiyopiyo'ji su tovi suvlo tokwe ilomavekullo'moneyokwe nomodukwopiyo'mokwono.

Toro te kevu kemi muunyu kai'muuda'ai Tellunumiyago yiuno sugudo to'no imo'nodowodo toolbusuko kubalno kevu kugaikul kuruv yiuno sugudo to'no neya jumo'nogaulo.”

Toro kuvi kuruv gumoro “tade” jo'mo tov yiuno “tade” to'no neya dumwalbinokwono. Aki gumoro “awiyo” jo'mo tov yiuno “awiyo” to'no neya dumwalbinokwono. Toro kuvi kuruv guvu subuu'yamju duuwiyo'mo tooku yogalo su tovallu muunyu toru yogalo bwotonyago togai'aro subuu'yamju aduuwibi to'gwowi yogalo su ton Satanyolluda'ai lokabupinogano.”

Aki Jisasol aro kuudokaikono. “Kevu aiyogasuro tooravuro yogalo aro ajajupo tovi me'no wuu'nodupudogaikikono. A'mwo pwol gumoro sumdo tovi kaiyako amollugolagumowo'ji tov kevu a'mwo kaiyako amollugolamowo'ji toolluro sumdo tovi kaiyako neya domollugolameyulo. Aki a'mwo pwol gumoro mago tovi agujopurowo'ji tov kevu a'mwo su toolluro mago kuvi kuruv neya dojopureyulo. Su toro tovi me'no wuu'nodupudogaikikono. Toro kuvi kuruv nuvno'gwowi aro ikudumo'mokwono. A'mwo pwol ma'no ma'no so'ji toollu guu a'mwo su toollu kaiyako migolbinono. Toro kweku kuruv a'mwo pwol gumoro anato tomguda'ai suuwado tovi alpuurogumollo'ji tov a'mwo su tool gumoro kwonamomguda'ai suuwado tovi alpuuronumolloneyokwe guu neya domorubweyono.

Neya duu'nyulo. Gumoro anato tomuuda'ai sumdo tov ma'no ma'no yo'moneyokwe tovino ame'nogumokwo'ji tov dogalowojodukwopiyono. Su tov aro tovinokwono. Gumoro kulako tov puvino supto sumo'nubi tov kula'nyokwono. Toro kweku kuruv guu sumdo puruvalokwe imo'no'bi ma'no ma'nodo tov kuuno gwo'dowo'jure tookujuro yiuwi'nokai kulako tokwe du'muudo tomuuno avla'bi to'gwowi kaiya'no kuunodokwono. Aki gumoro anato tov ma'no ma'no yo'mo tovino ame'nogumokwo'ji tov dodovomjulodukwopiyono. Su tov aro tovinokwono. Gumoro kulako tov puvino supto subi su tov kula'nyokwono. Toro kuvi kuruv guu ato puruvalokwe imo'no'bi ma'no ma'nodo tov kuuno gwo'dowo'jure tookujuro yiuwi'nokai kulako tokwe du'muudo tomuuno avla'bi to'gwowi kaiya'no kuunodokwono.”