Popular Bible Verses from Philippien 2

Share

Tochimitake eyeka nyò yò a machicha na botochibe b’iphwa, ko botulizaka manchoto ma beni, tika beni boyènize manchoto ma beni makoncha bwe, baninga balèki beni bononè. Moto tayengake beka ba wi phencha, ko, ayengaka nà ba baninga.

Mitema ma beni midyalaka ko motema ma Jésus mobèki bona

wango abèki tètè elenge a Nzambe, ko wango abochimunya edyalele yango ko eyeka echangwibe tonga n’idyala ko Nzambe bona ka, wango achambuzaki nchoto a wango koncha, n’achekwaki elenge a motamba, na nchoto a wango ichekwaki elenge a moto, wango atulizaki nchoto a wi koncha, abodyala n’iwokake ka kokoko ncho bowe, he, wango awokaki kokoko ncho bowe b’awèchinye.

tonga Nzambe adi koncha wango etubize bodingo na botoma o ch’a beni tonga bodingo ba wango bonyòngò tokieliba

Tonga wango akielaki kobona, Nzambe akondizaki wango kot’ekondize, n’aphèki wango kombo yango elèki makombo machò, echoko mangoto machò tanoteme o kombo a Jésus, bakoncha bango badi ikolo, o che, n’o ch’a che, na malèmu machò tachakola bwe, Jésus Christ adi Mokonchi tonga na botochibe ba Nzambe Chango yango.

bokielaka beka bichò kot’èkiele, tòlòkòchònòke na tochibake. Echoko beni todyala cheche n’iwò twa, bana ba Nzambe bango badi biphebo twa yango, o phanyak’a mololongi mwango mobidyobo na mobichekwa edyalele ebè kot’èchekwele, ”otete a mwango beni bodyale ko mienda m’ikolo o che bona”

Bakonde ba nga, kobona ko beni bowokaki machu machò bona, edi odyala okomo nga di o phanyak’a beni phencha ka, beni, bolekaka ewokele o nga di mochika na beni, na bokielaka mochalo ekielele enyòngò na bobo na mowato tonga n’iphola ichungib’a beni