Popular Bible Verses from Roma 5

Share

Nempa safe ma Ratu nose, nlengan nof a ne nbal, fali noak ma tose salar yadin, Ratu nfatutu Ni dalamy ngamone, ma nanrenre Yesus ninr Ray Silai ma nmat la nlitan kit nof ninr salar.

Ma farlan kit tikloi ma talele Ratu, keta dalminrar to suse fali Ratu nkamis resi kit. I nkamis kit a mpa I nal Ni Smwangtany ma nkarya na dalminrar. Ma Ni Smwangtany a ne ma nfatutu Ni dalamy ngamone ma nlie nlengan ber kit.

To lan iane nempa kit tsenang a nbal boloka tkoman suse, fali tafai feti suse ma tkoman a ne nose ma dalminrar ramkoran. Ma farlan tamkoran ma tabare suse, keta nose ma boninrar ral anteman ma diat kit. Ma iane nwayat ma tafal ma tikloi ma talele Ratu.

Wangur, lere ye Ratu nafdiat kit fali talele Yesus nir Ray Silai. Iane nwayat ma tangamon a tbali tor Ratu fali safe ma Yesus ninr Ray Silai nose ber kit a ne. Ma nof safe ma Yesus ninr Ray Silai nose ne iane neluk dalamtene ber kit ma tangamon a tbali tor Ratu fali talele I. I nose farane nema bise ma tkoman Ratu Ni dalamy ngamone ma nfatutu ber kit a ne. Iane nwayat ma tsenang resi fali talele feti keta nait e, kit bise ma tonri Ratu Ni dadangin.

Kit tafai feti Ratu nfatutu Ni dalamy ngamone ber kit fali I nfair kit ma to nukun kit. Ni botuan e, ka Ratu nukun kit fali ninr salar yadin ma to bise ma tafdiat kit a na sounlury. Nempa noak a ne Yesus ninr Ray Silai nmat la nlitan tomwat yatkar kit. Ma Ratu ntetak lere ma Yesus nmat ber kit a ne lo.

Ratu nafdiat kit a na sounlury fali Yesus ninr Ray Silai nmat ma darany a ntarbui ber kit lo. Ma nlengan a nbal e, lere ye kit tafai feti keta ninr Ray Silai nalin kit nof Ratu Ni resar na lere ma nma ne.

Mpa fali tomwatar sa to nose nlarat Ratu Ni faretar, nwayat ma tomwatar monuk rose sale. Farlan a nbal tomwatar sa nose nlarat Ratu Ni faretar, nwayat ma Ratu bise ma nafdiat tomwatar monuk na sounlury.

Ma to lan iane. Kit tsenang a nbal fali Yesus ninr Ray Silai ma neluk ninr Mangnrure ne, nose ma tangamon a tbali tor Ratu.