Popular Bible Verses from JESAJA 9

Share

Otwa valelwa omunona! Otwa pewa omumati! Epangelo olye; oli li komapepe ge. Ota lukwa Omupukululi omukumithi, Kalunga omunankondo, He yomuukwaaluhe, Omuwa gwombili.

Oshigwana she ende momilema, otashi mono uuyelele owindji. Oomboka ya kala momilema thokothoko, uuyelele otau ya minikile.

Uukwaniilwa we kau na mpoka tau hulu po, noshilongo she otashi kala aluhe shi na ombili. Ota ka kuutumba koshipangelapundi shaDavid ta lele oshilongo she. Oonkondo dhe odha kankamekelwa keutho nokuuyuuki, okuza nena sigo aluhe. Uulaadhi wOmuwa Omunankondoawike otau shi ningi.

Oongaku dhaahomoni noonguwo dhawo dha yaywa mombinzi otadhi fikwa po.

Itaku ka kala ku na ompito yokuhenuka uudhigu mbuka. Evi lyomazimo gaSebulon nogaNaftali olya li lya dhinika, ihe konakuyiwa esimano otali ke ya koshikandjo shika okuza kEfuta lyopokati sigo okevi lyohandiyaka yaJordan, nokuGalilea, moka aakwiilongo ya kala.

Aantu oto ya shambudha noonkondo, Omuwa, oto ya pe enyanyu enene. Otaa nyanyukilwa koshipala shoye, ngaashi aantu haa nyanyukwa, uuna taa teya iilya nenge taa topola oshihakanwa.

Oshoka ongoye wa teya ondjoko yawo ndjoka ya li ye yi uvitile uudhigu, nowa tokola ongola ndjoka ye ya dhenge komapepe. Omuwa, owa dhenge iigwana mbyoka ya hepeke aantu yoye, naanaa ngaashi wa dhengele Aamidiana nale ndjiyaka.