Popular Bible Verses from JESAJA 53

Share

Ihe okwa tsuwa omolwomayono getu nokwa nyanyagulilwa oondjo dhetu. Egeelo olye mu ya, opo tu mone ombili, notwa aludhwa kiilalo ye.

Otse atuhe twa pukile twa fa oonzi, noshaa ngoka okwi iyukile nepola lye mwene. Ihe Omuwa okwe mu tsike oondjo dhetu atuhe.

Oshili, okwi itsike uuvu wetu, nuuwehame wetu e u humbata. Otwe mu tala a dhengwa kuKalunga, a geelwa nokwa hepekwa.

Okwa li a dhinwa nokwe ekelwahi kaantu, omulumentu gwomahepeko nomuvuntu. Okwa li a fa ngoka aantu ye mu isiikilile iipala yawo, yaaye mu tale. Okwa li a dhinwa, natse inatu mu simaneka nando.

Okwa hepekwa nokwa monithwa iihuna, ihe ina makula okana ke. Ongaashi onzigona tayi falwa koshidhipagelo, ongonzi tayi mwenenene omukululi gwayo, osho naye wo ina makula okana ke.

Ihe olya li ehalo lyOmuwa oku mu nyanyula noku mu etela uuwehame. Eso lye olyo eyonondjambo, nota ka mona ko oluvalo lwe. Ehalo lyOmuwa otali gwanithwa muye.

Okwa kokele montaneho yOmuwa a fa oshitutuma, a fa oshimpona shomevi lya kalanda. Ka li e na olupe nenge ondjelo, sho twe mu tala. Ka li e na eopalo, tu mu hokwe ando.

Onkee ano otandi ke mu pa oshitendelwa mokati kaawa, oye nota ka topola iihakanwa pamwe naanankondo; oshoka omwenyo gwe okwe gu yambele meso, nokwa yalulilwa maakolokoshi. Okwa humbata po oondjo dhoyendji nokwa galikanene aayonaguli.

Konima yomahepeko gomwenyo gwe ota ka kala ishewe menyanyu; ota ka tseya kutya nani ina hepekwa osima yowala. Omupiya gwandje omuyapuki ota ka humbata egeelo lyoyendji, nomolwe otandi ya dhimine po.

Okwa kuthwa po a thiminikwa nokwa pangulwa, ihe olye gwomepipi lye e shi dhiladhila? Oshoka okwa kuthwa mo mevi lyaanamwenyo; Omolwomayono goshigwana shandje okwa adhika kegeelo.

Okwa pewa ombila ye paakolokoshi, ihe okwa fumvikwa pomuyamba, oshoka oye ina yona sha nokwa li kee na iifundja mokana ke.