Popular Bible Verses from Pedrin enzimäine kirjaine 2

Share

No työ oletto vallittu rodu, suuren Suarin pappikundu, pyhä rahvas, Jumalan oma rahvas, pandu sanelemah Hänen suurii ruadoloi, Hänen, kudai kučui teidy pimiespäi omah kumman valgieh.

Häi iče kandoi meijän riähkät omas rungas ristupuuh, gu myö, kudamat olemmo riähkih nähte kuolluot, eläzimmö sih niškoi, mi on oigei. Hänen kibiet parandettih teidy. Työ olitto gu yöksynyöt lambahat, a nygöi työ tulitto järilleh teijän hengen Paimoin luo da Kaččojan luo.

Enne työ etto olluh rahvas, a nygöi työ oletto Jumalan rahvas. Enne työ etto suannuh prosken՚n՚ua, a nygöi teidy prostittih.

Kui vasterodivunnuot lapset himoitelkuattokseh puhtastu Jumalan sanan maiduo, gu sen vuoh kazvua da piästä.

Minä kehitän teidy, kallehet vellet, kudamat elättö tulolazinnu vierahas muas, älgiä annakkua valdua rungan himoloile, kudamat toratah hengie vastah. Eläkkiä hyvin Jumalua tundemattomien rahvahien keskes, gu pahanluadijoikse teidy kirotes hyö nähtäs teijän hyvät ruavot da ylendettäs Jumalua senny päivänny, konzu Häi tulou suudimah muailmua.

Annakkua iččie elävikse kivikse hengellizen taloin nostandah, gu roija pyhäkse pappikunnakse da ruveta tuomah Jumalale hengellizii žertvoi, kudamat ollah Hänele mielužat Iisusan Hristosan täh.

Sendäh, hylläkkiä kai pahus da muanittelendu, älgiä heitelkiättökseh, älgiä kadehtikkua toizen hyviä, älgiä paiskua pahua toizih näh.

Tulgua Hänen luo, elävän kiven luo, kudai rahvas hyllättih, no kudai on Jumalan vallittu da Hänele kallis.

Työ oletto vällät, no yksikai vällyön nimel älgiä luajikkua pahua, a eläkkiä Jumalan käskyläzinny.

Sehäi on Jumalan tahto, gu työ hyvil ruadoloil panizitto lopun ellendämättömien rahvahien mielettömile paginoile.